Halldór Blöndal
halldorblondal@simnet.is
Páll Jónasson í Hlíð var sem endranær með vísnagátuna á laugardaginn var:
Í skóinn niður skjótt það fer.
Skakkt á minni smíði.
Nafn á brauði einnig er,
oft á kindum prýði.
Harpa í Hjarðarfelli rataði beint á lausnina:
Skóhornið í skóinn fer.
Skakkt er horn á smíði.
Kúmenhorn ég held sé hér.
Horn er kinda prýði.
Þá Úlfar Guðmundsson:
Skóhorn gerir lífið létt.
Lipur hornrétt smíði.
Börn af horni morguns mett.
Máttug hrútshorn prýði.
Guðrún Bjarnadóttir lætur ekki sitt eftir liggja:
Skóhornið er skrambi gott.
Skakkt horn? Það ég rengi!
En skinkuhorn er frekar flott
og fín hyrnd kind á engi.
Bergur Torfason slæst í hópinn:
Skóhorn fylgir fæti í skó,
Finnast skökku hornin nóg,
Horn úr brauði hefi ég þó,
Hyrnd var ærin Surtla er fló.
Loks Helgi Einarsson:
Skóhorn alloft munda menn.
Meinhorn finnast víða.
Bökuð horn við etum enn.
Ærnar hornin prýða.
Helgi lætur aðra vísu um misskilning fljóta með, upp á grin.
Í flestan sjóinn fær
mér fannst ég vera í gær,
sjálfumglaður
gáfumaður,
nei, gamall, elliær.
Lausnarorðið var sem sagt horn. Páll svarar sjálfur:
Hornskökk smíð mín alltaf er,
oní stígvél skóhorn fer.
Algengt brauð sem heitir horn,
horn þau prýða bústofn vorn.
Þá er það vísnagáta Páls fyrir næstu viku:
Þrjótur mig í þátíð sló,
þetta fjall rís brátt úr sjó,
undir bílinn settur sá,
sérnafn líka manni á.
Að síðustu limra eftir Jóhann S. Hannesson:
Það er bannað í Buenos Aires
að börn séu að leita sér færis
að sjá það í bókum
hvað sé undir brókum
á samskeytum kviðar og læris.