Launafólk þarf að vera grimmara

„Það gengur aldrei til lengdar að ríkissjóður sé rekinn hér með halla ár eftir ár,“ segir Vilhjálmur Birgisson formaður Starfsgreinasambandsins.

Miðað við nýtt fjárlagafrumvarp sem kynnt var á þriðjudag má gera ráð fyrir að halli ríkissjóðs nemi um 41 milljarði króna á næsta ári, samanborið við 57 milljarða halla á yfirstandandi ári.

„Hann er rekinn núna með 41 milljarðs halla og þar af leiðandi finnst mér eðlilegt að stjórnvöld reyni að gæta aðhalds og reyni að koma í veg fyrir það hvernig báknið hefur blásið út,“ segir Vilhjálmur í samtali við Morgunblaðið. Hann telur að launafólk þurfi að sýna stjórnvöldum aðhald og þurfi að vera betur upplýst um hvernig ríkið fari með með skattfé þess.

„Það er svo mikilvægt fyrir almenning að átta sig á því að horfa bara á launaseðilinn sinn og sjá alla fjármunina sem launafólk er að greiða í tekjuskatt og til sveitarfélaganna. Það er mitt mat að launafólk á að vera miklu grimmara í því að veita bæði ríki og sveitarfélagi aðhald um hvað er gert við skattfé almennings,“ segir hann.

„Eins og kemur fram er tekjuskattur á einstaklinga tæpir 300 milljarðar. Og auðvitað trónir virðisaukaskattur á toppnum í 430 milljörðum. Þannig að þetta eru gríðarlegar upphæðir sem launafólk er að greiða til ríkisins og það er eðlilegt að launafólk fylgist betur með hvernig stjórnvöld á hverjum tíma fyrir sig ráðstafi þeim fjármunum sem ríkissjóður hefur úr að spila.“

Hefur reynst millistéttinni vel

Vilhjálmur gagnrýnir einnig að ekki megi lengur ráðstafa inn á húsnæðislán samkvæmt nýju frumvarpi.

Árið 2014 var gert heimilt að nýta séreignarsparnað til að lækka höfuðstól húsnæðislána en eftir áramót rennur heimildin út og þá gildir úrræðið aðeins þegar um „fyrstu fasteign“ er að ræða.

Vilhjálmur segist harma það að þetta úrræði verði ekki framlengt að nýju.

„Þetta hefur reynst millitekjufólki gríðarlega vel við að lækka höfuðstólinn og fjölmargir hafa nýtt sér þetta. Og mér finnst það dapurt að þeir skuli hafa ákveðið að hætta með þetta.“ Honum finnst að stjórnvöld eigi að endurskoða ákvörðunina.