Biskup Íslands óskaði nýlega eftir presti til þjónustu við Hafnarfjarðarprestakall.
Tíu umsóknir bárust. Valnefnd hefur valið séra Þuríði Björgu Wiium Árnadóttur sóknarprest í Vopnafirði úr þeim hópi. Biskup Íslands hefur staðfest valið.
Sr. Þuríður Björg fæddist á Akureyri 21. nóvember 1989 og ólst upp á Vopnafirði. Foreldrar hennar eru Árni Magnússon rafvirkjameistari og Ásgerður Sigurðardóttir. Hún er yngst þriggja systkina.
Þuríður varð stúdent frá Menntaskólanum á Akureyri árið 2009 og útskrifaðist með embættispróf frá guðfræði- og trúarbragðadeild Háskóla Íslands 2017. Hún vígðist sem sóknarprestur til Hofsprestakalls í Vopnafirði sama ár. Hún hefur starfað sem sjúkrahúsprestur á Landspítalanum í afleysingu frá því í nóvember 2023.
Þuríður Björg sat í stjórn Lútherska heimssambandsins fyrir hönd þjóðkirkju Íslands árin 2017-2023 og hefur setið á kirkjuþingi síðan 2020. Hún situr nú í stjórn þjóðkirkjunnar.
Á árum sínum á Vopnafirði hefur hún verið formaður veiðifélags Hofsár og Sunnudalsár, setið í stjórn veiðifélags Sandvíkur og í stjórn Kvenfélagsins Lindarinnar.
Þuríður Björg er í sambúð með Ólafi Ragnari Garðarssyni fjármálaverkfræðingi og framkvæmdastjóra Angling IQ. Þau eiga tvö börn, 10 og 11 ára, og eru búsett í Mosfellsbæ. sisi@mbl.is