Knattspyrnumaðurinn Arnór Smárason ætlar að leggja skóna á hilluna að…

Knattspyrnumaðurinn Arnór Smárason ætlar að leggja skóna á hilluna að yfirstandandi tímabili loknu. Þetta tilkynnti hann í samtali við mbl.is og Morgunblaðið eftir leik ÍA og Víkings úr Reykjavík í 26. umferð Bestu deildarinnar á Akranesi á laugardaginn. Arnór, sem er 36 ára gamall, lék sinn síðasta heimaleik á ferlinum á laugardaginn en hann gekk til liðs við uppeldisfélag sitt ÍA fyrir tímabilið 2023 frá Val og lék með liðinu sama ár í 1. deildinni þegar ÍA vann deildina og tryggði sér sæti í Bestu deildinni. Hann á að baki farsælan feril sem atvinnumaður í Hollandi, Danmörku, Svíþjóð og síðast Noregi. Þá lék hann 26 A-landsleiki á ferlinum.

Kári Arnarsson var hetja Íslandsmeistara SR þegar liðið hafði betur gegn SA á Íslandsmótinu í íshokkí í Skautahöllinni í Reykjavík á laugardaginn. Leiknum lauk með sigri SR, 4:3, en Kári skoraði sigurmarkið þegar tæp mínúta var til leiksloka. SR er með 9 stig í efsta sæti deildarinnar en SA er í öðru sætinu með 6 stig, en SA á leik til góða á SR.

SA vann stórsigur gegn SR, 5:0, á Íslandsmóti kvenna í íshokkí í Skautahöllinni í Laugardal á laugardaginn. SA er í öðru sæti deildarinnar með 9 stig en SR er á botninum án stiga. Fjölnir er í efsta sætinu með 12 stig en SA á leik til góða á Fjölni.

Eygló Fanndal Sturludóttir er Norðurlandameistari í -71 kg flokki kvenna í ólympískum lyftingum. Eygló vann Norðurlandamótið í Færeyjum í gær en hún var einnig valin best í kvennaflokki. Í snörun lyfti Eygló 104 kg og í jafnhendingunni 130 kg. Hún lyfti því samtals 234 kg. Line Ravn Gude frá Danmörku hafnaði í öðru sæti en hún lyfti 227 kg. Í þriðja sæti var síðan Guðný Björk Stefánsdóttir sem lyfti alls 206 kg.

Sædís Rún Heiðarsdóttir og liðsfélagar hennar í Vålerenga eru norskir meistarar eftir sigur gegn Kolbotn, 3:0, á heimavelli í gær. Sædís lék fyrstu 69 mínúturnar en Vålerenga er með 66 stig á toppi deildarinnar þegar þremur umferðum er ólokið. Brann er í öðru sætinu með 55 stig og getur því ekki náð Vålerenga að stigum. Sædís Rún er á sínu fyrsta tímabili í atvinnumennsku en hún er tvítug.

Elías Már Ómarsson skoraði bæði mörk Breda þegar liðið hafði betur gegn Zwolle, 2:1, í hollensku úrvalsdeildinni í knattspyrnu í gær. Breda er með 12 stig í 9. sætinu eftir fyrstu níu umferðirnar.

Knattspyrnukonan Lára Kristín Pedersen er gengin til liðs við belgíska félagið Fortuna Sittard. Hún lék síðast með Fortuna Sittard í hollensku úrvalsdeildinni en hún skoraði sitt fyrsta mark fyrir félagið í gær þegar Club Brugge hafði betur gegn Anderlecht á heimavelli, 2:1, en Lára Kristín jafnaði metin fyrir Club Brugge í fyrri hálfleik. Club Brugge er með 9 stig í sjötta sæti deildarinnar en átta lið leika í efstu deild Belgíu.

Knattspyrnumaðurinn Gylfi Þór Sigurðsson gæti lagt skóna á hilluna þegar tímabilinu lýkur um næstu helgi. Þetta tilkynnti hann í samtali við fótbolta.net eftir leik FH og Vals í 26. umferð Bestu deildarinnar á Kaplakrikavelli á laugardaginn. Gylfi Þór, sem er 35 ára gamall, gekk til liðs við Val fyrir yfirstandandi tímabil og skrifaði undir tveggja ára samning á Hlíðarenda en hann sneri aftur á fótboltavöllinn eftir tveggja ára fjarveru á síðasta ári. Gylfi á að baki farsælan feril sem atvinnumaður í Bretlandi, Þýskalandi og Danmörku. Þá á hann að baki 83 A-landsleiki og 27 mörk og er markahæsti leikmaður í sögu karlalandsliðsins. Hann hefur leikið 17 leiki með Val í Bestu deildinni á tímabilinu og skorað í þeim 10 mörk.