Íbúðir Töluverð umframeftirspurn var eftir hlutdeildarlánunum.
Íbúðir Töluverð umframeftirspurn var eftir hlutdeildarlánunum. — Morgunblaðið/Ómar
Húsnæðis- og mannvirkjastofnun samþykkti umsóknir um hlutdeildarlán til kaupa á 61 íbúð af alls 145 umsóknum sem bárust um úthlutun lánanna í október. Alls var sótt um hlutdeildarlán upp á 1.879 milljónir kr

Húsnæðis- og mannvirkjastofnun samþykkti umsóknir um hlutdeildarlán til kaupa á 61 íbúð af alls 145 umsóknum sem bárust um úthlutun lánanna í október. Alls var sótt um hlutdeildarlán upp á 1.879 milljónir kr. en einungis 800 milljónir voru til úthlutunar fyrir þetta tímabil.

HMS opnaði fyrir umsóknir um hlutdeildarlán 4. október sl. en lokað var á umsóknir í maí sl. á meðan beðið var eftir frekari fjármögnun til lánveitinga.

Í frétt á vefsíðu HMS í gær segir að ekki hafi komið til þess að draga þyrfti úr umsóknum eins og útlit var fyrir um stund en töluverð umframeftirspurn var eftir lánunum. Eingöngu voru afgreiddar umsóknir þar sem staðfest kauptilboð lá fyrir.

„Af þeim umsóknum sem bárust voru 112 talsins með samþykktu kauptilboði og 33 umsóknir voru án kauptilboðs. Heildarfjárhæð umsókna var um 1.870 milljónir króna og þar af voru umsóknir með samþykktu kauptilboði samtals um 1.447 milljónir króna,“ segir í fréttinni.

Opna á aftur fyrir nýtt umsóknartímabil hlutdeildarlána fimmtudaginn 7. nóvember og mun umsóknartímabilið þá standa til 18. nóvember. Til úthlutunar á því tímabili verða 400 milljónir króna. omfr@mbl.is