Forseti lýðveldisins, Halla Tómasdóttir, tekur á móti Volodimír Selenskí Úkraínuforseta á Bessastöðum í dag kl. 8.30 og munu forsetarnir ræða þar ýmis mál í samskiptum ríkjanna. Þá er áætlað að Selenskí hitti einnig fulltrúa Alþingis.
Selenskí mun einnig sækja þing Norðurlandaráðs, sem verður sett kl. 14.15, og munu þeir Birgir Ármannsson forseti Alþingis og Einar Þorsteinsson borgarstjóri flytja þar setningarávörp. Þingfundurinn stendur til kl. 17, og verða þar m.a. samþykkt þingsköp og dagskrá fundarins.
Forsætisráðherrar Norðurlandanna funda einnig í dag og er efni fundarins hvernig unnt sé að tryggja sem best frið og öryggi á norðurslóðum og Norðurlöndum, sem og hvaða skref þurfi að taka til að efla norrænt samstarf á sviði viðbúnaðar í viðlögum og varnar- og öryggismála. Þá munu ráðherrarnir ræða hvernig Norðurlöndin geti stuðlað að stöðugleika á norðurslóðum í stærra samhengi.
Þá verður á leiðtogafundinum rædd framtíð norræns samstarfs og hvernig eigi að standa að endurskoðun Helsingforssamningsins, sem er grundvöllur norræns samstarfs.
Um kvöldið verður svo formleg afhending verðlauna Norðurlandaráðs og móttaka ríkisstjórnarinnar á Parliament-hóteli, en verðlaunahafar voru kynntir um síðustu helgi í sérstökum þætti sem sýndur var í Ríkissjónvarpinu.
Til baka
Leita í greinasafni
Prenta grein