Skýrsla TF-SIF verði oftar til taks. Hér er vél gæslunnar í flugtaki.
Skýrsla TF-SIF verði oftar til taks. Hér er vél gæslunnar í flugtaki. — Morgunblaðið/Árni Sæberg
Núverandi fyrirkomulag flugrekstrar Landhelgisgæslunnar og Isavia er best í fjárhagslegu tilliti. Þörf er á að auka viðveru flugvélar Landhelgisgæslunnar og með tilliti til viðbragðsgetu og þjónustustigs er samrekstur véla stofnananna besta fyrirkomulagið þótt það gæti reynst kostnaðarsamara

Ólafur Pálsson

olafur@mbl.is

Núverandi fyrirkomulag flugrekstrar Landhelgisgæslunnar og Isavia er best í fjárhagslegu tilliti. Þörf er á að auka viðveru flugvélar Landhelgisgæslunnar og með tilliti til viðbragðsgetu og þjónustustigs er samrekstur véla stofnananna besta fyrirkomulagið þótt það gæti reynst kostnaðarsamara.

Þetta kemur fram í skýrslu starfshóps dómsmálaráðherra, sem kanna átti fýsileika þess að reka sameiginlega flugvél fyrir Landhelgisgæsluna og Isavia.

Vildi kanna kosti þess að selja

Jón Gunnarsson þáverandi dómsmálaráðherra skipaði starfshópinn í júní 2023 en meginhlutverk hans var að kanna kosti þess að flugvélarnar tvær yrðu seldar og þess í stað ein vél rekin sem búin væri kostum til að sinna verkefnum beggja stofnana.

Niðurstaða starfshópsins er að flugvél Landhelgisgæslunnar, TF-SIF, henti ekki í öllum tilvikum þeim verkefnum sem TF-FMS, flugvél Isavia, er notuð í. Þá uppfylli TF-FMS ekki skilyrði sem gerð eru vegna verkefna TF-SIF. Starfshópurinn kemst jafnframt að því að viðbragðsgeta og þjónustustig versni ef aðeins ein flugvél sé til staðar fyrir stofnanirnar og þá gildi einu hvort vél finnist sem fullnægi kröfum þeirra beggja.

Starfshópurinn telur að best færi á því að Landhelgisgæslan ræki vélarnar þó að líkur séu á að ekki yrði um fjárhagslegan ávinning af slíku fyrirkomulagi að ræða og bendir á að mjög skýrt þyrfti að vera hver fjárhagsleg ábyrgð á rekstri og uppfærslum hvorrar flugvélar væri.