Hollendingurinn Erik ten Hag var í gær rekinn sem knattspyrnustjóri Manchester United. Ten Hag var ráðinn til United sumarið 2022 eftir að hann náði góðum árangri með Ajax í heimalandinu.
Tímabil United hefur alls ekki verið gott, því liðið er í 14. sæti ensku úrvalsdeildarinnar með ellefu stig eftir níu leiki. Þá er liðið sigurlaust í Evrópudeildinni.
United-liðið vann tvo titla undir stjórn þess hollenska; enska deildabikarinn tímabilið 2022/23 og enska bikarinn á síðasta tímabili.
Ruud van Nistelrooy, aðstoðarþjálfari og fyrrverandi framherji United, mun tímabundið taka við liðinu á meðan félagið leitar að nýjum stjóra.
The Athletic greindi frá í gær að sá stjóri gæti orðið Ruben Amorim, sem stýrir nú Sporting í heimalandinu Portúgal.
Miðillinn greindi frá að viðræður væru hafnar á milli félaganna og stjórans. Er enska félagið reiðubúið að greiða Sporting tíu milljónir evra til að fá Portúgalann yfir til Manchester.
Amorim hefur náð mjög góðum árangri með Sporting á undanförnum árum og í tvígang unnið bæði deildina og deildabikarinn í Portúgal. Er hann enn aðeins 39 ára gamall.
United er ekki fyrsta enska félagið sem Amorim er orðaður við, því hann hefur einnig verið orðaður við Liverpool og West Ham.
Til baka
Leita í greinasafni
Prenta grein