Björgunarmenn á Spáni leituðu í gær í bílakjöllurum að fórnarlömbum flóðanna miklu sem gengið hafa yfir austurhluta landsins síðustu daga. Að minnsta kosti 217 manns hafa farist í flóðunum og eru þau hin mannskæðustu í sögu Spánar. Þá er fjöldi fólks enn týndur í kjölfar flóðanna, og er óttast að meirihlutinn muni finnast látinn á næstu dögum.
Veðurstofa Spánar lýsti því yfir í gær að neyðarástandi væri nú lokið í Valencia-héraði, en úrhellisrigning var hins vegar í Katalóníu. Aflýsa eða fresta þurfti fimmtíu flugferðum til og frá El Prat-flugvellinum í Barcelona, og 17 farþegavélar voru sendar til annarra flugvalla vegna rigningarinnar.
Þá þurfti að loka hluta neðanjarðarlestarkerfisins í borginni og lestarferðum innan Katalóníuhéraðs var frestað.
Rannsaka aurkastið
Innanríkisráðherra Spánar, Fernando Grande-Marlaska, lýsti því yfir í gær að spænska þjóðvarðliðið hefði nú til rannsóknar atvikið í Paiporta um helgina, þar sem æstur múgur gerði hróp að Filippusi 6. Spánarkonungi og Letiziu drottningu og ataði þau og Pedro Sánchez forsætisráðherra auri. Sagði Grande-Marlaska að hægri-jaðarhópar hefðu staðið að baki ofbeldisverkunum.
Atvikið hefur vakið mikla athygli á Spáni, þar sem það undirstrikaði mikla reiðiöldu meðal almennings gagnvart stjórnvöldum vegna slælegra viðbragða við flóðunum, bæði fyrir og eftir að úrhellisrigningin sem var kveikjan að þeim hófst.
Yfirvöld í Valencia-héraði ákváðu í gær að framlengja ferðabann á almenning í tvo daga til þess að gefa viðbragðsaðilum meiri tíma til þess að bregðast við flóðunum. Þá hefur skólahaldi verið frestað og fólk hvatt til þess að vinna heiman frá sér.
Til baka
Leita í greinasafni
Prenta grein