Halli eykst um 17,6 milljarða

Útlit er fyrir að heildartekjur ríkissjóðs verði til muna minni á næsta ári en áætlað var þegar fjárlagafrumvarpið var lagt fram vegna minnkandi umsvifa í efnahagslífinu. Samkvæmt endurmati fjármála- og efnahagsráðuneytisins er nú gert ráð fyrir um 20,7 milljarða kr. lægri heildartekjum á árinu 2025 en áætlað var þegar frumvarpið var lagt fram. Á hinn bóginn lækka útgjöldin um 3,1 milljarð frá áætlun frumvarpsins.

Ráðuneytið hefur kynnt fjárlaganefnd endurmat á afkomu ríkissjóðs í ljósi nýrrar þjóðhagsspár ásamt tillögum um breytingar á fjárlagafrumvarpinu fyrir aðra umræðu og var fjallað um þær á fundi fjárlaganefndar í gær.

Vegna þessa er nú útlit fyrir að hallinn á ríkissjóði verði 17,6 milljörðum kr. meiri á næsta ári en lagt var upp með og verði 58,6 milljarðar á árinu 2025 en fjárlagafrumvarpið var lagt fram í september með 41 milljarðs kr. halla.

Njáll Trausti Friðbertsson formaður fjárlaganefndar segir að í grunninn sé ekki um stórvægilegar breytingar að ræða á afkomuhorfunum fyrir næsta ár og varðandi aðhald og önnur markmið sem stefnt er að. Tekjurnar minnki með minnkandi umsvifum í samfélaginu en ef litið sé á stóru myndina í ríkisfjármálunum sé ekki um miklar breytingar að ræða.

Við endurmat á heildartekjum ríkissjóðs lækka tekjur af virðisaukaskatti um 12,5 milljarða á næsta ári frá því sem áður var áætlað. Einnig er nú m.a. gert ráð fyrir að tryggingagjald og aðrir skattar skili 5,4 milljarða kr. lægri tekjum og arður og hluti af tekjum ríkisfyrirtækja lækki um 3,6 milljarða.

Á útgjaldahliðinni er m.a. gert ráð fyrir nýjum og auknum verkefnum fyrir 8,6 milljarða, sem lagt er til að komi til framkvæmda á árinu 2025. Er þessum breytingum mætt með samsvarandi lækkun á almennum varasjóði upp á sömu fjárhæð. Útlit er fyrir að skuldir ríkissjóðs verði 32,5% af vergri landframleiðslu í lok næsta árs en gert var ráð fyrir að hlutfallið yrði 31,4% í fjárlagafrumvarpinu.