Skipulagsmál borgarinnar í upplausn

Núverandi meirihluti í borgarstjórn hefur sýnt algjört getuleysi í úthlutun lóða undir íbúðarhúsnæði. Annar bragur var á borgarmálum, ekki síst í skipulagningu nýrra hverfa, þegar Davíð Oddsson gegndi starfi borgarstjóra.

Kröftug uppbygging

Á þeim tíma, eða allt frá 1982, var hafin kröftug uppbygging lóða undir íbúðar- og verslunarhúsnæði í Grafarvogshverfunum. Allir sem óskuðu eftir úthlutun lóðar fyrir íbúðar- eða verslunarhúsnæði og uppfylltu skilyrði til þess gátu fengið úthlutaða lóð. Mikið framboð var á lóðum undir sérbýli af ýmsum gerðum og hefur ekki verið meira síðan. Nú er staðan allt önnur.

Getu- og aðgerðaleysi

Getu- og aðgerðaleysi varðandi úthlutun lóða undir íbúðarhúsnæði af ýmsum tegundum hefur einnig átt stóran þátt í síhækkandi verði íbúðarhúsnæðis í Reykjavík. Núverandi meirihluti hefur lítinn ef nokkurn áhuga á því að breyta þessari stöðu, nema síður sé.

Sjá má tölur yfir nýjar og fullbúnar íbúðir í Reykjavík á síðustu árum í meðfylgjandi töfluriti en samkvæmt spá Húsnæðis- og mannvirkjastofnunar, sem sýnir úthlutun lóða undir íbúðarhúsnæði í Reykjavík, verður 2.768 lóðum úthlutað árið 2025 og aðeins 2.610 lóðum árið 2026.

Eins og áður segir virðist ljóst að núverandi meirihluti í borgarstjórn Reykjavíkur hafi hvorki vilja né getu til að breyta þessu ástandi. Sífellt fleiri Reykvíkingar flytja í nágrannasveitarfélögin, þar sem lóðaframboð er með öðrum og betri hætti en í Reykjavík.