Finnst skorta dýpri greiningar

Akkur – Greining og ráðgjöf er nýtt ráðgjafarfyrirtæki sem sérhæfir sig í að gefa út verðmöt og greiningar fyrir bæði einstaklinga og lögaðila. Stofnandi Akkurs er Alexander Jensen Hjálmarsson en hann hefur margra ára reynslu af störfum á fjármálamarkaði. Hann er með gráður í viðskiptafræði og verkfræði og meistaragráðu í fjármálum. Hann hóf feril sinn í eignastýringu hjá Sjóvá og var síðar ráðinn til GAMMA þar sem hann var í nokkur ár áður en hann fór yfir til Stoða. Hann lét af störfum hjá Stoðum fyrir nokkrum vikum og er nú að hefja sinn eigin rekstur.

Spurður hvers konar greiningar hann muni leggja áherslu á í sínum störfum segir Alexander að það verði fyrst og fremst greiningar á hlutabréfamörkuðum, bæði verðmöt og almenn umfjöllun.

„Ég geri ekki ráð fyrir að gefa út verðbólguspár en mun þó vera með umfjallanir um þær þjóðhagfræðilegu stærðir sem hafa áhrif á markaðinn. Ég ætla enn fremur að einblína á félög sem lítil erlend umföllun er um,“ segir Alexander.

Spurður hvort hann sjái tækifæri í að gefa út efni til erlendra aðila um íslenska markaðinn segir Alexander að það sé í skoðun.

„Ég hef hugsað mér að gefa einnig út greiningar um innlendu félögin á ensku. Slíkt hefur hingað til verið mjög takmarkað og einskorðast við örfá félög sem erlendir greiningaraðilar fylgjast með og það sem bankarnir og verðbréfafyrirtækin hafa gefið út til sinna viðskiptavina,“ segir Alexander.

Sér tækifæri á markaðnum

Spurður hvaða tækifæri hann sjái í því að hefja sinn eigin rekstur á þessu sviði segist hann vera á þeirri skoðun að það vanti dýpri greiningar á markaðinn.

„Þær greiningar sem innlendir aðilar eru að bjóða upp á í dag skortir oft á tíðum meiri dýpt. Ég hef starfað allan minn starfsferil í fjárfestingum og fundist vera vöntun á dýpri greiningum. Ég hef skilning á því að ef menn setja fram greiningar á öllum markaðnum þá er erfitt að fara á dýptina. Ég er að hugsa mína þjónustu sem viðbót við það efni sem nú þegar er í boði,“ segir Alexander.

Hann bætir við að hann geri sér grein fyrir því að hann muni ekki geta fylgst með og gert djúpar greiningar á öllum félögum.

Fyrsta verðmatið sem Akkur gefur út er frumskýrsla um Arion banka en hún kemur út í dag og er opin öllum á heimasíðu Akkurs,
www.akkur.net.

„Ég ætla að byrja á að greina bankana en eftir það mun ég gefa út verðmat á fleiri félögum,“ segir Alexander. Á næstu misserum gerir Alexander ráð fyrir að gefa út frumskýrslur, sem er þegar verðmat er gefið út í fyrsta sinn, á nokkurra vikna fresti.

Spurður hvort hann hyggist ráða fleiri starfsmenn með sér segir hann að það verði að koma í ljós.

„Ef vel gengur og það er eftirspurn eftir þessari þjónustu þá gæti það vel verið. Fyrst um sinn verð ég einn. Ég mun ekki ná að fjalla um öll félögin á markaðnum einn þannig að það gæti vel verið þegar fram líða stundir að maður fái einhvern með sér til þess að geta sinnt fleiri verkefnum,“ segir Alexander.

Spurður hvernig hann ætli að greina sig frá samkeppninni segir Alexander að hann sjái tækifæri í að vera með dýpri greiningar og betri framsetningu.

„Í grunninn er verðmat mjög einfalt fyrirbæri og hver sem er getur útbúið það. Þú ert einungis að finna núvirði af sjóðstreymi félagsins. Það er ekkert virði fólgið í að búa til verðmat. Það er virði í því að skilja reksturinn og forsendurnar sem búa þar að baki. Að spá í spilin hvernig félagið muni þróast til framtíðar og hvaða breytur hafa áhrif á sjóðstreymið og þar af leiðandi virði félagsins,“ segir Alexander.

Hann segir að Íslendingar séu heilt yfir hæfir á mörgum sviðum en sérhæfinguna skortir. Þar sem afar fá félög séu í íslensku kauphöllinni sé það vandkvæðum bundið að öðlast sérhæfni.

„Ég ætla mér að fjalla meira um reksturinn en aðrir hafa gert og setja meiri vinnu í verðmatið en bara stilla upp sjóðstreymislíkani. Hugmyndin er að fjalla meira um forsendur á bak við verðmatið sem mér hefur fundist vanta auk þess að söguleg gögn og forsendur séu sett fram myndrænt,“ segir Alexander.

Spurður hvernig honum finnist verðlagningin á félögum í íslensku kauphöllinni vera svarar Alexander að hann sjái mikil tækifæri í mörgum félögum á markaði.

„Þau eru líkt og gefur að skilja mismikil en það eru klárlega mörg félög sem eru undirverðlögð. Ef fjárfestar eru að horfa til lengri tíma þá er góður tími til að kaupa,“ segir Alexander.

Arion banki undirverðlagður

Spurður í hvaða félögum hann sjái helst kauptækifæri á markaðnum segir Alexander að það félag sem komi fyrst upp í hugann sé Arion banki.

„Mér finnst Arion banki vera undirverðlagður miðað við hvað undirliggjandi rekstur bankans er sterkur. Það eru ýmsar ástæður sem búa þar að baki eins og að vextir hafa verið háir lengi, áhugi Íslendinga á fjárfestingum er ekki mikill og það eru hvatar fyrir fólk um þessar mundir að geyma peninga á bankabók vegna hárrar ávöxtunar á innlánsreikningum,“ segir Alexander.

Hann bendir á að tölur frá Seðlabankanum sýni að sparnaður heimila á innlánsreikningum er mikill.

„Ef skoðað er það sem heimilin eiga í sjóðum, í hlutfalli við innlán heimilanna, þá er það í sögulegri lægð. Innlánin eru að hrúgast upp meðan fjárfesting í sjóðum hefur staðið í stað. Ég tel að við eigum mikið inni þarna,“ segir Alexander og bætir við að þegar vextir halda áfram að lækka þá geti ruðningsáhrifin orðið mikil þegar þeir peningar sem nú eru á innlánsreikningum leita inn á markaðinn.

Vill aukna umræðu um fjárfestingar

Spurður hvort hann hyggist aðeins selja greiningarnar sínar til fjármálafyrirtækja eða hvort hann ætli einnig að bjóða almenningi upp á að kaupa greiningarnar segir Alexander að hann ætli að gera hvort tveggja. Fyrsta greiningin, sem er líkt og áður sagði verðmat á Arion banka, er opin öllum. Síðan mun hann læsa efninu og byrja að selja áskriftir.

„Einstaklingsáskrift verður ódýrari en lögaðilaáskrift, ég mun hefja sölu á áskriftum til einstaklinga fyrir 5.000 kr. á mánuði strax eftir áramót. Ég mun þó alltaf birta fría og styttri útgáfu af verðmötunum 1-2 vikum síðar,“ segir Alexander.

Hann segir að sér finnist mikilvægt að auka áhuga almennings á fjárfestingum og vill aukna umræðu um fjármál á Íslandi. Það að birta fría útgáfu af greiningum er framlag hans til þess.

„Ég var formaður Ungra fjárfesta fyrir mörgum árum og síðan þá hef ég alltaf haft áhuga á að auka áhuga almennings á fjárfestingum. Ég hef verið í samtali við fjármálastofnanir um að styðja við bakið á mér í að efla umræðuna því það er til mikils að vinna fyrir alla. Eins og staðan er í dag hefur almenningur ekki mikinn aðgang að verðmötum nema úr þeim fréttum sem af þeim birtast,“ segir Alexander.

Hann segir að Svíum hafi tekist mjög vel til að auka áhuga almennings á fjárfestingum. Miðað við stærð landsins er hlutabréfamarkaðurinn margfalt stærri þar bæði í fjölda fyrirtækja og virkni markaðarins.

„Þar í landi á almenningur í mörgum tilfellum meirihlutann í þeim félögum sem skráð eru á markað,“ segir Alexander.

Spurður hvaða skref hann myndi vilja sjá til að efla íslenska hlutabréfamarkaðinn segir hann að mikilvægast sé að einfalda kerfið og setja á skattalega hvata.

„Í Svíþjóð virkar skattkerfið þannig að þú þarft ekki að telja fram hver einustu viðskipti sem þú gerir. Þú gefur bara upp stöðuna á vörslusafninu þínu í lok ársins. Þannig að það er mun einfaldara en hér á Íslandi. Þar eru einnig skattalegir hvatar til hlutabréfakaupa og fólk hefur meira frelsi til að ráðstafa séreignarsparnaði sínum,“ segir Alexander.