Mikið svigrúm til bætinga

Kantmenn íslenska karlalandsliðsins í fótbolta eru allir á besta aldri en þeir fimm leikmenn sem spiluðu flesta leiki í þessari stöðu á árinu 2024 eru á aldrinum 22 til 26 ára.

Þeir eru flestir komnir með ágætis reynslu eftir að hafa komið inn í liðið á undanförnum fjórum til sex árum og geta allir bætt talsverðu við sig. Sá yngsti þeirra, Mikael Egill Ellertsson, er kominn lengst hvað félagslið varðar en hann er fastamaður í liði í ítölsku A-deildinni.

Jón Dagur Þorsteinsson og Willum Þór Willumsson tóku báðir hliðarskref á ferlinum í sumar og fóru í stærri félög þrátt fyrir að þeir leiki ekki í efstu deild í vetur. Arnór Sigurðsson er í toppbaráttu í ensku B-deildinni og beðið hefur verið eftir því um nokkurt skeið að Mikael Anderson taki skrefið upp í sterkari deild en þá dönsku.

Það er því full ástæða til að ætla að þessir leikmenn eigi allir eftir að verða betri og geti blómstrað með íslenska landsliðinu fram á næsta áratug 21. aldarinnar.

Um leið bera að hafa í huga að kantmenn eiga það til að færa sig inn á miðjuna þegar aldurinn færist yfir og um það eru einmitt dæmi í landsliði Íslands. Birkir Bjarnason, Arnór Ingvi Traustason og nú síðast Jóhann Berg Guðmundsson hafa allir farið af kantinum inn á miðjuna á síðari hluta ferilsins.

Alls léku sjö leikmenn í stöðum kantmanna með landsliðinu á árinu 2024 og hér fyrir neðan er farið yfir þá og þeirra stöðu í dag, sem og þeirra fjögurra efnilegu leikmanna sem voru í stöðum kantmanna í 21-árs landsliðinu á þessu ári.

Undir skilgreininguna kantmenn falla þeir sem spila á vinstri eða hægri kanti í leikaðferðinni 4-3-3 og þeir sem leika hægra og vinstra megin á miðjunni í leikaðferðinni 4-4-2.

 Jón Dagur Þorsteinsson spilaði mest af kantmönnum Íslands á árinu 2024. Hann lék níu af tólf landsleikjum ársins, átta þeirra í byrjunarliðinu, og skoraði tvö mörk. Sigurmarkið gegn Englandi á Wembley og seinna markið í heimasigrinum gegn Svartfjallalandi, 2:0.

Jón Dagur er 26 ára gamall, hefur spilað 42 landsleiki og skorað í þeim sex mörk. Hertha Berlín í Þýskalandi keypti hann af OH Leuven í Belgíu í ágúst. Jón hafði þá skorað eitt mark í þremur leikjum í byrjun belgísku A-deildarinnar. Hann hefur leikið 12 af 13 leikjum Herthu í þýsku B-deildinni eftir komuna þangað, sex þeirra í byrjunarliðinu.

 Mikael Anderson lék sjö landsleiki á árinu, fimm þeirra í byrjunarliðinu, en missti af tveimur síðustu leikjum ársins.

Mikael er 26 ára gamall en hann hefur leikið 31 landsleik og skorað í þeim tvö mörk. Jöfnunarmark hans á sjöundu mínútu uppbótartíma í Albaníu fyrir tveimur árum kom Íslandi í umspil um sæti á EM 2024. Mikael leikur nú sitt fjórða tímabil með AGF í dönsku úrvalsdeildinni. Þar er hann í stóru hlutverki, hefur verið í byrjunarliði í öllum 17 leikjum liðsins í deildinni í vetur og skorað tvö mörk.

 Willum Þór Willumsson lék sjö landsleiki á árinu, allt saman mótsleiki og tvo þeirra í byrjunarliðinu.

Willum er 26 ára gamall og hefur spilað 15 landsleiki. Enska félagið Birmingham City keypti hann í sumar af Go Ahead Eagles í Hollandi. Willum er í stóru hlutverki hjá liðinu í toppbaráttu C-deildarinnar en hann hefur spilað 17 af 18 leikjum liðsins í deildinni, 15 þeirra í byrjunarliðinu, og skorað fjögur mörk.

 Mikael Egill Ellertsson lék fimm landsleiki á árinu, allt mótsleiki og einn þeirra í byrjunarliðinu.

Mikael Egill er 22 ára, hefur spilað 19 landsleiki og skorað eitt mark. Hann leikur sitt þriðja tímabil með Venezia sem er nýliði í ítölsku A-deildinni í vetur. Þar hefur Mikael spilað 15 af fyrstu 16 leikjum tímabilsins, 11 þeirra í byrjunarliði, og skorað sín fyrstu tvö mörk í þessari sterku deild. Hann er aðeins fimmti Íslendingurinn frá upphafi sem skorar í deildinni.

 Arnór Sigurðsson lék fjóra landsleiki á árinu, einn þeirra í byrjunarliði, en missti af síðustu fjórum leikjunum vegna meiðsla og veikinda.

Arnór er 25 ára, hefur spilað 34 landsleiki og skorað í þeim tvö mörk. Hann leikur sitt annað tímabil með Blackburn í ensku B-deildinni en hefur misst af stórum hluta þess, aðeins náð að spila fimm leiki sem varamaður og skorað eitt mark.

 Birnir Snær Ingason lék einn landsleik á árinu en hann var í byrjunarliði í vináttuleik gegn Gvatemala í janúar. Það var hans fyrsti landsleikur.

Birnir er 28 ára og lék sitt fyrsta tímabil með Halmstad í sænsku úrvalsdeildinni. Hann lék 26 af 30 leikjum liðsins, 16 þeirra í byrjunarliði, og skoraði fjögur mörk.

 Jason Daði Svanþórsson lék tvo fyrstu landsleiki ársins, vináttuleiki, báða sem varamaður.

Jason er 24 ára og hefur leikið fimm landsleiki. Hann kom til Grimsby í ensku D-deildinni frá Breiðabliki í júlí og hefur spilað 18 af 20 leikjum liðsins, 14 þeirra í byrjunarliði, og skorað eitt mark.

 Ari Sigurpálsson er 21 árs, lék með 21-árs landsliðinu í ár og skoraði átta mörk í 26 leikjum Víkings í Bestu deildinni.

 Ísak Andri Sigurgeirsson er 21 árs, lék með 21-árs landsliðinu og skoraði fjögur mörk í 20 leikjum með Norrköping í sænsku úrvalsdeildinni.

 Óskar Borgþórsson er 21 árs, lék með 21-árs landsliðinu og spilaði 20 leiki með Sogndal í norsku B-deildinni.

 Óli Valur Ómarsson er 21 árs, lék með 21-árs landsliðinu og skoraði fimm mörk í 22 leikjum með Stjörnunni í Bestu deildinni, þar sem hann var í láni frá Sirius í Svíþjóð. Hann er genginn til liðs við Breiðablik.