Auglýsingin var villandi

„Auglýsingin sem birt var í Fréttablaðinu sama dag getur þannig ekki talist fullnægjandi auglýsing að þessu leyti. Sú auglýsing var villandi og ekki til þess fallin að vekja athygli á breytingunum og framsetning hennar vekur spurningar.“

Þetta kemur fram í bréfi sem lögmannsstofan Logos sendi fyrir hönd Búseta til Reykjavíkurborgar vegna vöruhússins við Álfabakka 2 í Suður-Mjódd í vikunni.

„Þær breytingar sem um ræðir voru auglýstar með öðrum tillögum að breyttu deiliskipulagi og hverfisskipulagi í Reykjavík undir millifyrirsögninni „Bryggjuhverfi dælustöð“. Þar er aðallega vikið að breytingu á deiliskipulagi Bryggjuhverfis en aftast í þeirri umfjöllun, án aðgreiningar eða fyrirsagnar, er í beinu framhaldi í textanum vikið að breytingum á Álfabakka. Kynning á deiliskipulagsbreytingunum árið 2022 var því ekki í samræmi við lög, sem takmarkaði enn frekar möguleika íbúa á svæðinu og hagsmunaaðila til að gera athugasemdir við skipulagsferlið,“ segir í bréfi Logos.

Í bréfinu kemur jafnframt fram að í desember 2020 hafi umboðsmaður Alþingis gert frumkvæðisathugun á því hvernig staðið var að kynningu á deiliskipulagsbreytingu við Álfabakka 2. Í bréfi til Skipulagsstofnunar kynnir hann þá athugun sína og bendir á að kynning á leyfi til framkvæmda og byggingar sem veitt sé á grundvelli skipulags þurfi að taka mið af því að þeir sem málið kunni að varða geti í heild áttað sig á því hvað felst í umræddri framkvæmd eða byggingu.