Jólaball Krakkar á leikskólanum Urriðabóli í Reykjavík taka hér við góðgæti úr höndum jólasveina sem trölluðu með þeim á litlu jólunum á aðventunni.
Jólaball Krakkar á leikskólanum Urriðabóli í Reykjavík taka hér við góðgæti úr höndum jólasveina sem trölluðu með þeim á litlu jólunum á aðventunni. — Morgunblaðið/Karítas
Friður Alla jafna eru þau óvinir, hundurinn Óreó og kisan Vala, en á þessari stundu á heimili þeirra á Tálknafirði var allt í friði og spekt er þau litu út í snjóinn á aðventunni. Annars vill Óreó yfirleitt vingast við Völu en það er langt frá því að vera gagnkvæmt.
Skrautleg Leppalúði og Grýla bregða á leik í jólaskóginum í Tjarnarsal Ráðhúss Reykjavíkur.
Austurvöllur Nemendur í 2. bekk Vesturbæjarskóla dansa hér dátt í kringum Oslóartréð á Austurvelli.
Þjóðminjasafnið Okkar elstu jólasveinar mættu daglega í safnið á aðventunni og hér er Hurðaskellir á ferð.
Næring Þegar búið er að dansa nokkra hringi kringum jólatréð er gott að fá sér hressingu.
Gleði Hér skín gleði úr andlitum barnanna á jólaballi Urriðabóls á dögunum.
Vinir Stúfur og Kjötkrókur á ferð saman.
Brosa Í gervi jólasveins og álfs í Kringlunni.
[ Smellið til að sjá stærri mynd ]
Á jólunum er gleði og gaman, fúmm, fúmm, fúmm, þá koma allir krakkar með í kringum jólatréð, er sungið í þekktu jólalagi við texta Friðriks Guðna Þórleifssonar. Sannarlega orð að sönnu. Jólin eru hátíð barnanna er gjarnan sagt, en fátt gleður þau…

Á jólunum er gleði og gaman, fúmm, fúmm, fúmm, þá koma allir krakkar með í kringum jólatréð, er sungið í þekktu jólalagi við texta Friðriks Guðna Þórleifssonar. Sannarlega orð að sönnu.

Jólin eru hátíð barnanna er gjarnan sagt, en fátt gleður þau meira en að hitta jólasveinana þegar þeir koma til byggða, mæta á jólaböllin og dansa í kringum jólatré. Þó að jólasveinarnir séu aðeins 13 talsins ná þeir að komast yfir ótrúlega þétta dagskrá á aðventunni um borg og bý. Fara hratt yfir og stoppa stutt á hverjum stað. Eftir standa börnin glöð í bragði flest hver, þótt vissulega séu einhver smeyk við þá rauðklæddu ef þeir eru með mikla háreysti. Sveinkar skilja eftir sig góðgæti úr poka en í seinni tíð hefur gotterí tekið yfir epli og mandarínur sem gjarnan voru á boðstólum fyrrum.

Mestu skiptir að börnin eigi gleðileg jól þótt við vitum að þannig sé það ekki í öllum tilvikum, því miður. Sem betur fer er stuðningsnet til staðar sem grípur þá sem eru í neyð. Þar vinna hjálparstofnanir mjög göfugt og gott starf, sem ber að þakka heilshugar fyrir.

Ljósmyndarar Morgunblaðsins hafa líkt og jólasveinarnir verið á þönum á aðventunni og fengið að fylgja þeim eftir á ýmsum stöðum. Einnig hefur sést til foreldranna, Grýlu og Leppalúða, sem sjaldan eru langt undan.