Lagning Sundabrautar hornreka hjá ríki og borgarstjórn

Áhugaleysi um lagningu Sundabrautar yfir Elliðaárvog virðist algjört hjá ríki og borgarstjórn. Sú framkvæmd myndi m.a. létta verulega á umferðarþunga milli Reykjavíkur og Mosfellsbæjar og jafnframt stytta akstursleiðina milli Reykjavíkur og Vestur- og Norðurlands.

Tillaga í borgarstjórn

Í borgarstjórn 21. mars 2017 var eftirfarandi tillaga borgarfulltrúa Sjálfstæðisflokksins samþykkt samhljóða:

„Borgarstjórn samþykkir að hefja viðræður við innanríkisráðuneytið um Sundabraut. Markmið þess er að vinna að arðsemismati og kostnaðargreiningu, ákveða endanlega útfærslu og legu brautarinnar og tímasetja framkvæmdir.“

Skorað á borgaryfirvöld

Ljóst er að lítið sem ekkert kom út úr viðræðum við ríkið um málefni Sundabrautar. Eins og staðan á þessu mikilvæga verkefni er í dag virðist fátt ef nokkuð vera að gerast hvað framkvæmdir við brautina varðar. Ugglaust hafa einhverjar viðræður átt sér stað milli ríkis og borgaryfirvalda um tímasetningu á byggingu Sundabrautar, sem síðan lítið er gert með. Borgaryfirvöld ættu að upplýsa borgarbúa um stöðu þessa mikilvæga máls.

Skorað er á borgaryfirvöld að beita sér enn frekar fyrir því í viðræðum milli borgar og samgönguráðuneytisins að þessari mikilvægu framkvæmd verði hraðað sem allra mest.