Ríflega fjögur þúsund manns lögðu leið sína í Bláfjöll í gær enda var óvænt logn og blíða gærdagsins tilvalið veður til skíðaferðar. „Þetta var geggjaður dagur,“ sagði Einar Bjarnason rekstrarstjóri skíðasvæðisins í samtali við Morgunblaðið. Hann sagði að gærdagurinn hefði verið sá aðsóknarmesti í vetur.
Þrátt fyrir mikið sólarveður var þó afar kalt, allt að 11 gráða frost, en skíðafólkið var flest vel klætt að sögn rekstrarstjórans. Forstöðumenn skíðasvæðisins bjuggust ekki við mikilli aðsókn, og ekki við slíku veðri heldur. Um morguninn var mikið hvassviðri en svo rættist úr þegar skyndilega tók að lygna. Og með logninu flykktust fjölskyldur á svæðið.
Skíðalyftan Drottningin bilaði um morguninn og var ekki kippt í lag fyrr en upp úr hádegi, þar sem skemmdir urðu á stjórnkassa á skíðasvæðinu í óveðri sem skall á annan í jólum. „Ég held nú að flestir hafi samt verið ánægðir. Þetta var bara svo „gordjöss“ dagur.“
Til baka
Leita í greinasafni
Prenta grein