Aðalsteinn Þorkelsson fæddist 26. janúar 1955 á Hellissandi. Hann lést 22. nóvember 2024 eftir stutt veikindi.

Foreldrar hans voru Anna Ólína Unnur Annelsdóttir, f. 31. október 1931, d. 21. desember 2013, og Þorkell Guðmundsson, f. 24. júní 1926, d. 16. júlí 1996.

Fósturforeldrar hans voru Guðbjörg Stella Haraldsdóttir, f. 26. mars 1927, d. 21. september 2017, og Jónas Einarsson, f. 25. júní 1924, d. 19. ágúst 1995.

Systkini Aðalsteins frá Keflavík eru Guðmundur, f. 1948, Agnar Breiðfjörð, f. 1953, Halldór Rúnar, f. 1954, Jón Ásgeir, f. 1956, Hansborg, f. 1957, Annel Jón, f. 1959, Guðlaug Ágústa, f. 1960, d. 2015, Steinunn, f. 1962, og Björg, f. 1964.

Systkini hans frá Borðeyri eru Haraldur, f. 1956, Guðlaug, f. 1958, Þórey, f. 1961, og Silja, f. 1972.

Dóttir Alla er Stella Mjöll Aðalsteinsdóttir, f. 30. mars 1976. Synir hennar eru Sölvi Fannar, f. 2001, og Ragnar Snær, f. 2007.

Útför Aðalsteins fór fram í kyrrþey 3. desember 2024.

Aðalsteinn var glaðvær og vinnusamur maður sem ávallt lét gott af sér leiða. Hann átti sinn langa starfsferil hjá RARIK sem línumaður, þar sem dugnaður hans og vandvirkni voru í hávegum höfð. Hann naut þeirrar virðingar að vera traustur félagi og ómetanlegur samstarfsmaður sem lagði hjarta sitt í störf sín.

Þrátt fyrir ýmislegt mótlæti í lífinu lét Aðalsteinn aldrei deigan síga. Hann var þekktur fyrir góða lund og óbilandi húmor, sem skapaði dýrmæt tengsl við þá sem hann kynntist. Fjölskyldan var honum alltaf kær og hann var sérstaklega stoltur af dóttur sinni, Stellu, og tveimur barnabörnum, þeim Sölva Fannari og Ragnari Snæ. Þau voru ljós í lífi hans og fylltu hann gleði og stolti.

Við vottum Stellu og hennar drengjum og öðrum aðstandendum okkar dýpstu samúð.

Hvíl í friði kæri bróðir.

F.h. systkina og maka,

Jón Ásgeir Þorkelsson.