Þéttingin mun rýra lífsgæði íbúa

Anna Jörgensdóttir, íbúi við Valshlíð á Hlíðarenda, segir fyrirhugaða uppbyggingu 245 íbúða á nærliggjandi lóð munu rýra mjög lífsgæði íbúa í hverfinu. Allt of langt sé gengið í að þétta byggð í borginni.

Umrædd lóð er í eigu Knattspyrnufélagsins Vals.

Sagt var frá því í Morgunblaðinu 22. ágúst 2023 að fulltrúar Vals hefðu sent borginni ósk um að fá að breyta hluta af æfingasvæði félagsins í íbúðalóð. Þ.e.a.s. á svonefndum J-reit.

Vestasti hlutinn

„Þessi hluti æfingasvæðisins, sá vestasti, er nú í órækt og að hluta notaður sem geymslusvæði. Austan við hann eru tveir æfingavellir með gervigrasi og þeir verða áfram í notkun. Á milli vallanna tveggja er reiknað með því að fyrirhuguð borgarlína komi. Erindi Vals er til meðferðar hjá skipulagsfulltrúa Reykjavíkur,“ sagði í blaðinu.

Nánar var fjallað um málið í blaðinu 12. október 2023. Þar kom fram að Valur hefði sótt um að fá að bæta við 108 íbúðum á svonefndum A-reit og hafa alls 175 íbúðir á reitnum.

Er því í undirbúningi að byggja 245 og 175 íbúðir á tveimur lóðum í eigu Vals, alls 420 íbúðir, en það gæti skilað félaginu tæpum fimm milljörðum, sé tekið mið af söluverði lóðar undir 65 íbúðir á Nauthólsvegi 79, gegnt A-reit. Er borgin nú að yfirfara athugasemdir út af A-reit.

Anna Jörgensdóttir segir lóðina þar sem reisa á 245 íbúðir, J-reitinn, árum saman hafa verið til mikils ama fyrir íbúa hverfisins.

„Við íbúar erum margir, ef ekki flestir, mjög ósáttir við þau áform Vals og Reykjavíkurborgar að byggja risablokk með 245 íbúðum en þarna átti að vera grænt svæði eða íþróttavöllur samkvæmt gildandi deiliskipulagi. Við keyptum íbúðir okkar af félaginu Hlíðarfæti, sem var að mestu í eigu Vals, og aldrei var minnst á hugmyndir um að byggja á svæðinu og er forsendubrestur margra íbúa því algjör.

Enn ófrágengið

Nú eru 3-5 ár liðin síðan við flest fluttum inn í íbúðir okkar en alltaf er svæðið fyrir framan húsið okkar ófrágengið og hefur umgengni þar verið til vansa fyrir hverfið og ásýnd þess í heild sinni. Hefur það verið nýtt fyrir ýmsan úrgang, drasl, númerslausa bíla, ólöglega búsetu í hjólhýsi og sem bílastæði auk þess sem malarhaugar og grjóthrúgur hafa verið á lóðinni í lengri tíma,“ segir Anna, sem sendi heilbrigðiseftirliti borgarinnar erindi í haust vegna þessa. Fékk hún það svar eftir tvo mánuði að kvörtunin hefði týnst í kerfinu og var spurð hvort staðan hefði breyst.

Þá gagnrýnir Anna uppbyggingu Hlíðarhorns þar við hlið. Þar voru hugmyndir um 450 herbergja hótel en úr varð að byggðar voru 195 íbúðir. Er fyrsti stigagangurinn kominn í sölu. Anna segir að við uppbyggingu Hlíðarhorns hafi bil milli hússins og næstu blokkar á móti verið stytt með því að fjarlægja bílastæði og trjábeð milli húsa. Þá hafi verið þrengt að gangstéttum og bílastæði fylgi ekki íbúðum á Hlíðarhorni nema til útleigu. Með Hlíðarhorni og fyrirhugaðri uppbyggingu 245 íbúða þar við hlið sé aukið enn á bílastæðavanda hverfisins.

„Ég spyr: Hver tekur ákvörðun hjá borginni að fara í þennan leiðangur? Þau virðast ekki hlusta á neinn fyrr en skaðinn er skeður. Þessi uppbygging mun auka skuggavarp og rýra lífsgæði íbúa hverfisins,“ segir Anna.