Hafna hugmyndum sviðsstjórans

„Það stenst ekki skoðun að gagnrýna hönnun hússins við Árskóga 7 þegar tekið er til varna fyrir skipulagsmistök við Álfabakka 2,“ segja arkitektarnir Aðalheiður Atladóttir og Falk Krüger um ummæli Ólafar Örvarsdóttur sviðsstjóra hjá Reykjavíkurborg í Spursmálum Morgunblaðsins sl. föstudag.

Í máli Ólafar kom meðal annars fram að leitað væri allra leiða til að leiðrétta mistökin og jafnvel að breyta hönnun Búsetahússins við Árskóga 7.

Aðalheiður og Falk sem eru arkitektar hússins við Árskóga 7 segja að mikið samstarf hafi átt sér stað við hönnun hússins milli Búseta, Reykjavíkurborgar og þeirra sem hönnuða.

Samræmist ekki aðalskipulagi

„Við unnum þetta í góðu samkomulagi við borgina og breyttum teikningum til þess að koma til móts við þarfir Félagsbústaða um stærðir íbúða í þeirra eigu. Verkefnið sem við tókum að okkur fyrir Búseta var að hanna 72 íbúðir við Árskóga miðað við deilskipulag sem var í gildi 2015. Þá var gert ráð fyrir mun minna umfangi á húsinu við Álfabakka 2.“

Gamla skipulagið gerði ráð fyrir tveimur T-laga blokkum, en þar sem áhersla Búseta var á fjölda lítilla íbúða hafi komið betur út að hanna húsin í U-laga byggingar þar sem fleiri íbúðir íbúðir myndu njóta sólar.

„Í samráði við höfund deilskipulagsins var skipulaginu breytt með tilliti til þess að sem flestar íbúðirnar nytu birtu. Af þessum 72 íbúðum eru fjórar íbúðir í húsinu númer 7 sem snúa í norðvestur en njóta líka birtu úr suðaustri. Þær íbúðir nutu síðdegissólar áður en veggurinn reis.“

Þau benda á að vöruhúsið og starfsemin sem þar eigi að koma samræmist ekki Aðalskipulagi Reykjavíkur þar sem lóðin er á Miðsvæði þar sem gert sé ráð fyrir verslun, skrifstofum, þjónustu, veitingastöðum, gistihúsum og íbúðum.

„Í þessu húsi verður iðnaðarstarfsemi sem þjónar ekki borgarhlutanum eins og aðalskipulagið gerir ráð fyrir.“

Eftirlitsaðilar brugðust

Aðalheiður og Falk spyrja sig hvers vegna þetta hafi ekki verið stoppað hjá Skipulagsstofnun sem hefði getað stöðvað þetta með athugasemd, hvers vegna grenndarkynning hafi ekki farið fram og hvers vegna auglýsingin í Fréttablaðinu, sem var falin, var ekki leiðrétt, ef um var að ræða mistök í uppsetningu blaðsins.

Þau benda á að umræða um nýtingarhlutfall á lóðinni hafi verið villandi og fulltrúar borgarinnar nýti það sem rök að dregið hafi úr byggingarmagni úr 15.000 fermetrum í 11.000 fermetra.

„Salarhæðin í Álfabakka er um 13 metrar og rúmmál byggingarinnar því margfalt miðað við það sem gera má ráð fyrir þegar verið er að meta byggingarmagn út frá nýtingarhlutfalli og því hefur byggingarmagnið í raun aukist umtalsvert þegar horft er til rúmmáls.“

Fram hefur komið í umfjöllun Morgunblaðsins að verulega hafi vantað upp á þau gögn sem lögð voru fram til samþykktar hjá byggingarfulltrúa og að engir séruppdrættir hafi verið áritaðir fyrr en eftir að húsið var risið.

Aðalheiður og Falk segja að venjulega þurfi arkitektar að leggja fram þrívíddarmyndir, sýna skuggavarp og fjarlægð í næstu byggingar þegar gögn eru lögð fram til afgreiðslu.

„Ekkert af þessu var gert og við erum mjög hissa á því hvers vegna skipulagsyfirvöld kröfðust ekki þessara skýringarmynda. Það voru allt aðrar kröfur gerðar til Álfabakka 2 heldur en arkitektar eru vanir.“

Stenst ekki skoðun

Þau brosa þegar þau eru spurð um þá hugmynd Ólafar Örvarsdóttur, sviðsstjóra umhverfis- og skipulagssviðs, að breyta húsinu við Árskóga 7 og t.d. færa svalir á íbúðunum sem snúa að græna veggnum.

„Árskógar 7 er vel hannað hús og stenst alla skoðun miðað við það skipulag sem var í gildi, en þá var gert ráð fyrir mun umfangsminna húsi við Álfabakka 2.“

Spurð hvernig þau sjái fyrir sér lausn í málinu segjast þau telja að eðlilegt fyrsta skref hefði verið að stöðva framkvæmdirnar, en því hafi verið hafnað af borginni.

Vegna umræðu og hugmynda um að einhver kaupi húsið af Búseta segja þau að húsið hafi verið löngu hannað og byggt þegar skemman reis og það standist ekki skoðun að byggð hús þurfi að taka tillit til þess sem á eftir kemur.

„Búsetahúsið er sérstaklega hannað fyrir þetta íbúamynstur og byggist á ákveðinni hugmyndafræði með sameiginlegum sal þar sem íbúarnir eiga möguleika á að hittast. Uppkaup á íbúðum leysir ekki þann vanda sem aðrir íbúar verða fyrir,“ segja Aðalheiður Atladóttir og Falk Krüger, arkitektar hjá A2F arkitektum.