Norska handknattleiksfélagið Vipers Kristiansand, eitt fremsta kvennalið heims um langt árabil, er gjaldþrota. Félagið hefur þegar hætt starfsemi og lýkur keppni á toppi norsku úrvalsdeildarinnar, þar sem það hafði unnið tíu af fyrstu ellefu leikjum sínum á tímabilinu

Norska handknattleiksfélagið Vipers Kristiansand, eitt fremsta kvennalið heims um langt árabil, er gjaldþrota. Félagið hefur þegar hætt starfsemi og lýkur keppni á toppi norsku úrvalsdeildarinnar, þar sem það hafði unnið tíu af fyrstu ellefu leikjum sínum á tímabilinu.

Þá var liðið í fimmta sæti af átta í B-riðli Meistaradeildar Evrópu eftir níu umferðir af fjórtán.

Vipers Kristiansand hefur staðið frammi fyrir mikilli óvissu á yfirstandandi tímabili. Peter Gitmark, þáverandi stjórnarformaður félagsins, tilkynnti í október að Vipers þyrfti að safna 25 milljónum norskra króna, 332 milljónum íslenskra króna, innan þriggja daga til þess að forðast gjaldþrot.

Gjaldþrot virtist ætla að verða niðurstaðan þá en fjárfestar komu til skjalanna á ögurstundu, tóku yfir félagið sem nýir hluthafar og hugðust greiða úr miklum fjárhagsvandræðum þess. Nú er ljóst að það tókst ekki.

Vipers hefur orðið norskur meistari undanfarin sex ár, eftir að félagið vann titilinn í fyrsta skipti árið 2018, og vann Meistaradeildina þrjú ár í röð, 2021, 2022 og 2023.

Þekktasti leikmaður liðsins er Katrine Lunde, sem varði mark norska landsliðsins, 44 ára gömul, þegar það varð Evrópumeistari í desember og Ólympíumeistari síðasta sumar.