Líflegur fjölskyldumaður og gæfusamur stjórnandi

Kjartan Örn Sigurðsson fæddist 15. janúar 1975 í Reykjavík og ólst upp í Seljahverfinu. Frá níu ára aldri og fram á unglingsár dvaldi Kjartan á sumrin á Hvítanesi í Skilmannahreppi, þar sem hann starfaði sem vinnumaður hjá hjónunum Margréti Magnúsdóttur og Marinó Tryggvasyni. Hann gekk fyrst í Ísaksskóla og kláraði svo grunnskólagönguna í Seljaskóla, Á grunnskólaárunum æfði Kjartan júdó og skíði með Ármanni, söng með skólahljómsveit og starfaði sem umboðsmaður fyrir hljómsveitir.

Á árunum í Verslunarskólanum, þar sem Kjartan lauk stúdentsprófi árið 1996, var hann öflugur í félagslífi skólans. Hann tók sæti í ritnefnd Viljans, söng í skólakórnum og fór með aðalhlutverk í skólasýningunum Múrnum og Cats. Kjartan var einnig virkur í Morfís-liði skólans, leikstýrði stuttmynd og lagði sitt af mörkum við ýmsa viðburði, þar á meðal við stofnun 12:00 sem færði nemendum vikulegar fréttir í sjónvarp skólans. Á framhaldsskólaárunum stundaði hann einnig nám við Söngskóla Reykjavíkur og menntaði sig sem flugmaður. Á sautján ára afmælisdaginn fékk hann bílpróf, mótorhjólapróf og sólópróf í flugi.

Kjartan hóf nám í stjórnmálafræði við Háskóla Íslands árið 1997 og dvaldi einnig við nám í frönsku við Université Paul-Valéry í Montpellier árið 2000. Þó að barneignir og tækifæri til starfa í útlöndum hafi teygt út námsferilinn, útskrifaðist Kjartan með fyrstu einkunn sem stjórnmálafræðingur frá Háskóla Íslands árið 2012, og hlaut MBA-gráðu frá sömu stofnun árið 2017. Auk þess hefur Kjartan lokið stjórnendanámi frá virtum háskólum eins og Georgetown University í Washington D.C., Yale School of Management og IESE.

Eftir að hafa lokið stúdentsprófi hóf Kjartan störf sem sölumaður nýrra bíla hjá BL. Hann var ráðinn markaðsstjóri fyrirtækisins tveimur árum síðar. Árið 1999 stýrði Kjartan einnig sjónvarpsþættinum „Út að borða með Íslendingum“ á Skjá1 ásamt Ingu Lind Karlsdóttur, sem var sýndur á föstudagskvöldum í beinni útsendingu frá hinum ólíku veitingastöðum landsins.

Kjartan réð sig sem framkvæmdastjóra sölu- og markaðssviðs hjá Strax í Bretlandi árið 2001. „Þetta var uppbyggingarverkefni og við vorum stórhuga. Á fimm árum óx Strax í Evrópu úr engu í einn af stærstu dreifingaraðilum á aukahlutum fyrir farsíma í álfunni.“ Árið 2007 flutti Kjartan aftur heim til Íslands með fölskyldunni og tók við stöðu forstjóra hjá Egilsson hf. þar sem hann stýrði fjárhagslegri endurskipulagningu fyrirtækisins, sem á þeim tíma rak verslanir Office1 en rekur í dag verslanirnar A4. Árið 2012 tók Kjartan næsta stóra skref á ferli sínum og stofnaði fyrirtækið SRX ehf. í samstarfi við viðskiptafélaga sína frá árunum hjá Strax. Með því að beita sömu árangursríku formúlu og hafði skilað árangri áður, tókst SRX að vaxa hratt. Á nokkrum árum var félagið orðið eitt af 300 stærstu fyrirtækjum á Íslandi. Það var svo árið 2021 að SRX ehf. yfirtók rekstur Ormsson hf. og Kjartan tók við hlutverki forstjóra og eiganda í sameinuðu félagi. „Frá því að við tókum yfir Ormsson er fyrirtækið aðeins eitt af tveimur félögum á raftækjamarkaði sem hafa vaxið á tímabilinu. Ég er afar þakkátur þeim góða og samheldna hópi starfsmanna sem hafa gert þetta mögulegt.“

Kjartan var virkur í félagsskap Vöku meðan hann stundaði nám við Háskóla Íslands og hefur lengi verið áberandi í starfi Sjálfstæðisflokksins, þar sem hann hefur tekið að sér ýmis trúnaðarstörf, setið í nefndum og stjórnum. Árið 2010 náði hann kjöri í bæjarstjórn Álftaness og gegndi þar stöðu formanns bæjarráðs. Kjartan leiddi einnig sameiningarviðræður við Garðabæ, og fyrir sameiningu sveitarfélaganna árið 2012 var hann síðasti formaður Sjálfstæðisfélags Álftaness. Eftir sameininguna var hann varabæjarfulltrúi í bæjarstjórn Garðabæjar til ársins 2022 og sat í leikskólanefnd, skólanefnd og skipulagsnefnd sveitarfélagsins. Auk þess hefur Kjartan setið í stjórnum Sjálfstæðisfélags Garðabæjar, Ungmennafélags Álftness, Samtökum verslunar og þjónustu (SVÞ), Samtökum atvinnulífsins (SA) auk fjölmargra fyrirtækjastjórna, þar á meðal í Skeljungi hf., Magn í Færeyjum, Strax AB í Svíþjóð, Verna hf. og fleiri fyrirtækjum. Þá hefur Kjartan haldið úti hlaðvarpinu „Firmað Ritar“ ásamt Kolbeini Marteinssyni, eiganda samskiptafyrirtækisins Athygli.

Kjartan nýtur þess að fara reglulega í Álftaneslaug, þar sem hann hefur mótað sér ákveðna rútínu: Fyrst dvelur hann í sána í fimmtán mínútur, fylgir því eftir með þremur mínútum í kalda pottinum og endar svo á því að slaka á í heita pottinum. Hann lýsir þessari stund sem „fullkominni slökun“. Hann hefur mikinn áhuga á útivist og elskar að vera úti í náttúrunni, hvort sem er í gönguferðum, veiði, á fjallahjóli eða á skíðum. „Við fjölskyldan höfum lagt stund á skíðaiðkun og okkur finnst gaman að ferðast um landið, njóta þess sem íslensk útivistarparadís hefur upp á að bjóða. Við höfum til dæmis prófað svifflug og zipline, auk þess að nýta okkur nýja fjallahjólaslóða sem hafa verið lagðir um land allt.“ Þá er Kjartan heimakær fjölskyldumaður sem nýtur þess að elda góðan mat handa sínum nánustu, spila á gítar, syngja og hlusta á tónlist.

Fjölskylda

Foreldrar Kjartans eru Sigurður Björnsson, f. 17.5. 1952, fv. framkvæmdastjóri, og Stella Sharon Kiernan, f. 15.5. 1953, hjúkrunarfræðingur.

Systkini Kjartans eru 1) Anna Kristín Sigurðardóttir Kiernan, f. 12.12. 1976, innheimtufulltrúi, Garðabæ; 2) Sigurður Jens Sigurðsson, f. 16.12. 1983, verkfræðingur, Reykjanesbæ; 3) Andri Stanley Sigurðsson, f. 22.1. 1986, sölustjóri, Mosfellsbæ; 4) Hrefna Marín Sigurðardóttir, f. 18.11. 1992, dönskukennari, Garðabæ.

Unnusta Kjartans er Gunnhildur Guðnadóttir, f. 20.5. 1977, förðunarfræðingur og stílisti. Foreldrar Gunnhildar: Helga Hauksdóttir Nordström, f. 9.5. 1965, sjúkraliði og Guðni Rúnar Halldórsson, f. 13.12. 1954, d. 4.2. 1980, kaupmaður í Reykjavík.

Börn Kjartans eru 1) María Sól, f. 1999, „fashion art director“ frá Polimoda; 2) Karen Ósk, f. 2004, nemi í viðskiptafræði við Háskóla Íslands; 3) Ragnhildur Elva, f. 2007, nemi í Kvennaskóla Reykjavíkur; 4) Katla Diljá, f. 2009, nemi í Álftanesskóla.

Börn Gunnhildar eru 1) Kolbeinn Elí Pétursson, f. 1991, fjármálagreinandi; 2) Ragnheiður Helga Blöndal, f. 1998, BA í „fashion branding“; 3) Sigurbjörg Birta Pétursdóttir, f. 2001, verslunarstjóri; 4) Þuríður Guðrún Pétursdóttir, f. 2003, nemi í arkitektúr við Listaháskóla Íslands.