Fagna ákvörðun lögreglustjórans

„Við erum ánægð með að ákvörðun lögreglunnar um að hætta rannsókninni sé í samræmi við væntingar okkar. Þetta gefur okkur tækifæri til að loka þessum kafla og einbeita okkur að áframhaldandi vinnu að sjálfbærri laxaframleiðslu,“ segir Stein Ove Tveiten, forstjóri Arctic Fish.

Greint var frá því á þriðjudag að lögreglustjórinn á Vestfjörðum hefði fyrr í mánuðinum ákveðið að fella niður sakamálarannsókn í tengslum við slysasleppingu úr kví Arctic Fish í Patreksfirði í ágúst 2023, er um 3.500 laxar struku út um tvö göt sem höfðu myndast. Er þetta í annað sinn sem málið er fellt niður.

Til skoðunar var hvort Stein Ove bæri refsiábyrgð á því að fiskur slapp úr kví félagsins með því að vanrækja að til staðar væri nauðsynlegur umbúnaður við fiskeldið, en ákvörðun lögreglustjórans var tekin með vísan til 145. greinar í lögum um meðferð sakamála sem bendir til þess að embættið hafi talið gögn málsins ekki nægileg eða líkleg til þess að leiða til sakfellingar.

„Eftir atvikið í ágúst 2023 fórum við í ítarlega úttekt og hófum aðgerðir sem bæði styrkja starfsemi okkar og draga úr hættu í framtíðinni,“ svarar Stein Ove, spurður hvað hafi verið gert hjá félaginu til að koma í veg fyrir sambærilegt atvik í framtíðinni.

Gripu til aðgerða

Hann segir að gripið hafi verið til fleiri aðgerða í þessu samhengi og bendir m.a. á að fóðurdreifara sem stuðlaði að því að gat myndaðist á kvínni hafi verið skipt út, skoðunarferlar á kvíum hafi verið uppfærðir og fylgir því tíðari skoðanir og hraðari eftirfylgni, auk þess sem menntun og þjálfun allra starfsmanna hafi verið efld.

Stein Ove segir einnig aukna áherslu lagða á að uppfæra og innleiða verklagsreglur reglulega. „Auk þess erum við stöðugt að meta tækninýjungar sem geta stuðlað að því að bæta rekstur okkar enn frekar. Við lítum á þennan viðburð sem tækifæri til að læra og þróast, og okkur er mikið í mun að stöðugt hækka gæðaviðmiðin okkar.“