Rödd Íslands

Við höfum nýlega haldið hátíð ljóss og friðar og fögnum nýju ári með nýrri ríkisstjórn. Í heiminum er hins vegar ekki friðvænlegt og í Evrópu hefur í nær þrjú ár geisað versta stríð frá lokum seinni heimsstyrjaldar, fyrir nær 80 árum, eða um það bil mannsaldri. Fáir muna því hörmungar þess stríðs með beinum hætti og kannski er nú lögð minni rækt við það alþjóðlega samstarf sem komið var á við stríðslok, til að koma í veg fyrir að slíkar hörmungar endurtaki sig.

Ég vil ekki á neinn hátt afsaka hina ósvífnu innrás Rússa í Úkraínu og ég dáist að því baráttuþreki sem Úkraínumenn sýna í varnarbaráttu sinni. Við Íslendingar höfum stutt dyggilega við bakið á Úkraínumönnum og ber að gera það áfram. Hins vegar verður ekki bundinn endi á þetta hryllilega stríð með því að senda sífellt fleiri og öflugri vopn til Úkraínu. Til að friður komist á þurfa stríðandi aðilar að tala saman, með hjálp velviljaðra þjóða, og gera samkomulag um frið.

Við Íslendingar erum smáþjóð, sem getur lítið lagt af mörkum í stríði. Sem þjóð meðal þjóða getum við hins vegar talað með öflugum hætti fyrir friði í Úkraínu og heiminum öllum. Ég vona að ný ríkisstjórn og nýr utanríkisráðherra láti rödd Íslands hljóma hátt og skýrt og tali fyrir uppbyggjandi samstarfi milli þjóða og samtali milli stríðandi fylkinga, hvar sem er í heiminum. Það getum við meðal annars gert þar sem við eigum sæti við borðið í alþjóðlegu samstarfi, eins og í norrænu samstarfi, hjá NATÓ og hjá Sameinuðu þjóðunum.