Algjör mar-tröð í Zagreb

Ísland á litla von um að ná sæti í átta liða úrslitum heimsmeistaramóts karla í handbolta eftir tap fyrir Degi Sigurðssyni og hans mönnum í Króatíu, 32:26, í 2. umferð milliriðils 4 í Zagreb í gærkvöld.

Ólíklegt er að sigur á Argentínu í lokaumferð riðilsins nægi til að fara áfram, þar sem auk þess þarf að treysta á hagstæð úrslit í öðrum leikjum eins og útskýrt er nánar hérna hægra megin í opnunni.

Staðan hjá íslenska liðinu fyrir leikinn var þannig að það hefði mátt tapa honum með þriggja marka mun en verið samt nánast öruggt um sæti í átta liða úrslitunum. Króatarnir þurftu minnst fjögurra marka sigur til að ná yfirhöndinni í innbyrðis leikjum gegn Egyptalandi og Íslandi, þar sem útlit var og er fyrir að öll þrjú liðin endi með átta stig í riðlinum.

Tuttugu í fyrri hálfleik

Fyrri hálfleikurinn var hreint út sagt algjör martröð og staðan að honum loknum var 20:12. Íslenska liðið var búið að fá á sig tveimur mörkum meira en í öllum leiknum gegn Slóveníu síðasta mánudagskvöld.

Króatar komust mest tíu mörkum yfir en íslenska liðið náði að koma muninum niður í sex mörk í seinni hálfleiknum. Þá varði Viktor Gísli Hallgrímsson ellefu skot eftir að hafa ekki varið eitt einasta í þeim fyrri.

Ísland mætir Argentínu á morgun klukkan 14.30. Ef öll úrslit verða eftir bókinni fer liðið heim að milliriðlinum loknum þrátt fyrir fimm sigra í sex leikjum á mótinu.

Þá er hætt við að þessi hræðilegi fyrri hálfleikur gegn Króötum í gærkvöld verði lengi í minnum hafður.