Orri Steinn Óskarsson sá um að gulltryggja spænska liðinu Real Sociedad sæti í umspili Evrópudeildar karla í fótbolta í gærkvöld þegar hann skoraði bæði mörkin í heimasigri liðsins gegn PAOK frá Grikklandi, 2:0.
Orri skoraði bæði mörkin með skalla eftir fyrirgjafir frá hægri, á 44. og 48. mínútu leiksins, og engu munaði að hann fullkomnaði þrennuna þegar hann skallaði í þverslá af örstuttu færi skömmu síðar.
Midtjylland eða AZ
Real Sociedad endar í 13. sæti og mætir annaðhvort Midtjylland frá Danmörku eða AZ Alkmaar frá Hollandi í umspilinu. Komist liðið í gegnum þá hindrun er ljóst að Orri og félagar mæta annaðhvort Manchester United eða Tottenham í sextán liða úrslitum.
Elías Rafn Ólafsson landsliðsmarkvörður gæti því mætt Orra en hann gat ekki leikið með Midtjylland vegna meiðsla í gærkvöld þegar liðið komst áfram með jafntefli, 2:2, gegn Fenerbahce frá Tyrklandi.
Íslendingaliðið Elfsborg frá Svíþjóð missti naumlega af sæti í umspilinu, á markatölu, þegar liðið tapaði 3:0 fyrir Tottenham í London. Eggert Aron Guðmundsson kom inn á hjá Elfsborg undir lok leiksins en Júlíus Magnússon, sem er nýkominn til Elfsborg, hefði ekki mátt leika með liðinu fyrr en í umspilinu.
Ensku liðin Manchester United og Tottenham tryggðu sér þriðja og fjórða sætið en United vann FCSB í Rúmeníu, 2:0, með mörkum frá Diogo Dalot og Kobbie Mainoo.
Til baka
Leita í greinasafni
Prenta grein