Orri Páll Ormarsson
Sjónvarpsaugnablik ársins 2024 var án nokkurs vafa viðtalið sem Telma Tómasson fréttamaður tók við Magnús Þór Jónsson, formann Kennarasambands Íslands, í beinni útsendingu á Stöð 2 vegna skæruverkfalla sem þá stóðu yfir. Gjörningurinn minnti að vísu meira á þriðju gráðu yfirheyrslu en viðtal enda var Telmu, sem alla jafna er prúð og yfirveguð í settinu, gríðarlega heitt í hamsi og lék hún vægðarlausan sóknarleik gegn Magnúsi sem þó hélt kúlinu og varðist eins og hægt var við þessar óvæntu aðstæður. Gjörsamlega mergjað stöff og sjónvarpssögulegur viðburður.
Nú styttist aftur í verkföll kennara og þegar fyrsta frétt á Stöð 2 í vikunni var um málið og Telma í settinu veðraðist ég allur upp; nú hlyti Magnús að mæta í aðra lotu. Ég rauk því til, sótti legghlífarnar, pungbindið og plastgóminn til að vera við öllu búinn. Hjartað barðist í brjósti mér, eins og þegar allt er jafnt hjá Íslendingum og Svíum í handbolta og 23 sekúndur eftir af leiknum.
En hvað var a'tarna? Magnús mætti ekki og fréttin bara leið hjá. Í staðinn fór Telma beint í jarðhræringar og Ármann Höskuldsson, líklega afslappaðasti maður landsins og þótt víðar væri leitað, kom til hennar í enn einni rúllukragapeysunni. Átök urðu engin. Það var skellur.
Til baka
Leita í greinasafni
Prenta grein