Flokkur fólksins til Persónuverndar

Kjósandi í Suðurkjördæmi hefur sent Persónuvernd erindi þar sem beðist er rannsóknar á því hvort persónuvernd hafi verið brotin á kjósendum í kjördæminu í nýliðnum kosningum með afhendingu kjörskrár til annarra aðila en fullgildra stjórnmálaflokka.

Það er hagfræðingurinn Erna Bjarnadóttir, fv. varaþingmaður Miðflokksins og aðstoðarframkvæmdastjóri Bændasamtakanna, sem sendi erindið til Persónuverndar.

Erna vísar til ákvæðis í 31. gr. kosningalaga, þar sem segir að eftir að kjörskrá er tilbúin sé þeim stjórnmálasamtökum, sem bjóða fram lista við kosningar, heimilt að óska eftir rafrænum aðgangi að kjörskrá hjá Þjóðskrá.

Stjórnmálasamtökum er heimilt að nýta aðganginn í þágu eftirlits með framkvæmd kosninga, til að sannreyna hverjir séu kjósendur og koma upplýsingum á framfæri við þá í aðdraganda kosninga, en óheimilt að birta hana eða miðla upplýsingum úr henni.

Við vinnslu persónuupplýsinga skv. ákvæðinu þurfa stjórnmálasamtök að uppfylla skilyrði laga um persónuvernd og vinnslu persónuupplýsinga.

Í erindi sínu bendir Erna á að fyrir liggi ákvörðun um að synja Flokki fólksins um opinber fjárframlög þar sem hann sé ekki réttilega skráður sem stjórnmálasamtök og álitamál uppi um lögmæti slíkra greiðslna til fleiri samtaka. Hún telur því „eðlilegt næsta skref að rannsaka hvort aðrir en löglega skráð stjórnmálasamtök eiga rétt á að fá kjörskrár afhentar“ á grundvelli fyrrnefndra laga.

Morgunblaðið óskaði staðfestingar Persónuverndar á móttöku erindisins. Helga Þórisdóttir svaraði að sitt fólk væri að skoða málið og að frekari svara mætti vænta síðar.

Enginn vafi í huga ráðherra

Blaðið sneri sér því til Þorbjargar Sigríðar Gunnlaugsdóttur dómsmálaráðherra og spurði hvort fleiri sérréttindi stjórnmálasamtaka en opinber fjárframlög væru upphafin ef skráningu væri ábótavant; hvort Flokkur fólksins nyti þeirra frekar en önnur almenn félagasamtök.

„Flokkur fólksins er stjórnmálaflokkur. Kjörnir fulltrúar þess flokks sitja á Alþingi og flokkurinn á sæti í ríkisstjórn. Allir sjá að það er stjórnmálaflokkur sem þar situr,“ segir dómsmálaráðherra.

„Hvað varðar skráningu þá liggja upplýsingar fyrir og flokkurinn hafði ekki skráð sig með réttum hætti. Brestur var á þessu hjá allnokkrum flokkum, allt frá Sósíalistum til Sjálfstæðisflokks,“ bætir Þorbjörg við, þó ekki hafi áður verið efast um fullgilda skráningu þeirra í aðdraganda kosninga í fyrra. Flokkur fólksins hefur hins vegar enn ekki skráð sig sem stjórnmálasamtök.

„Varðandi afhendingu á kjörskrá þá fer hún eftir kosningalögum þar sem einfaldlega er litið til þess hvort stjórnmálaflokkur sé í framboði,“ segir dómsmálaráðherra og minnir á að í greinargerð við lagabreytingu 2021, þar sem kveðið var á um skráninguna, hafi sérstaklega verið áréttað að slík krafa um skráningu gæti falið í sér hindrun fyrir þá sem vilja bjóða fram í kosningum.