Af hrygg, gátu og Tenerife

Hildur Sverrisdóttir sagði í umræðum um stefnuræðu forsætisráðherra að ríkisstjórnin væri „óþægilega markalaus“ þegar kæmi að því að fara með sitt nýfengna vald. Jón Jens Kristjánsson sneri út úr því:

Valkyrjustjórnin með völdin fer

virðist þó tæp á ránni

sem að mun vera af því hún er

ekki í markaskránni.

Vísnagáta liðinnar viku barst sem endranær frá Páli Jónassyni í Hlíð á Langanesi:

Oft við bónorð brotnar sá,

býsna víða fjalli á,

kappi haldinn kvíða‘ og sorg,

og kenndur er við þýska borg.

Eins og áhugamenn þekkja felst merking lausnarorðsins í hverri línu gátunnar. Guðrún Bjarnadóttir leikur sér með lausnina:

Hryggbrotin, var hafnað, ligg.

Á hrygginn fjalls samt klifið gat,

döpur, hrygg. En dýran hrygg

um datt, Hamborgarjólamat!

Lausnarorðið er hryggur og ólík merking í hverri línu. Það þvælist ekki fyrir Úlfari Guðmundssyni:

Bónorðs hryggbrotin mæða menn.

Mikill fjallshryggur heillar enn.

Kappi hryggur af kvíða´ og sorg.

Kenndur er hryggur við Hamborg.

Erla Sigríður Sigurðardóttir er með svarið sem hún tileinkar þeirri mætu konu, Sigríði á Sunnuhlíð í Kópavogi:

Biðill oft hryggbrotinn er,

beittur fjallahryggur.

Hryggur jafnvel jaxlinn fer,

jólahrygginn tyggur.

Helgi Einarsson sendir lausnina alla leið frá Tenerife:

Hryggbrotinn harm sinn ber.

Hryggur mjög dapur er.

Hamborgarhryggurinn.

Hryggur er kamburinn.

Þá er það vísnagáta Páls fyrir næstu viku:

Í vörubílum ennþá er,

uppi timburhúsið ber

Færeyingum finnst hún góð,

fest við staur og lokar slóð.

Friðrik Steingrímsson var eins og Helgi á Tenerife en varð fyrir óhappi!

Rólegur í sælu sat

á sólarströnd með drykk og mat,

þegar dúfu djöfullinn

drullað'oní bjórinn minn.