„Afturför fyrir jafnréttismál“

„Niðurstaðan er auðvitað mikil vonbrigði fyrir Aldísi og afturför fyrir jafnréttismál og skyldu atvinnurekanda til að jafna stöðu kynjanna á íslenskum vinnumarkaði,“ segir Erna Guðmundsdóttir, lögmaður dr. Aldísar G. Sigurðardóttur, lektors við Háskólann í Reykjavík. Kærunefnd jafnréttismála komst að þeirri niðurstöðu nýverið að ekki hefði verið um mismunun að ræða á grundvelli kyns, þegar ráðherra skipaði Ástráð Haraldsson í embætti ríkissáttasemjara 2023 og gekk fram hjá Aldísi. Erna rak mál Aldísar fyrir kærunefndinni.

Segir hún í samtali við Morgunblaðið að Aldís geri ýmsar athugasemdir við niðurstöðuna og að hennar mati skauti nefndin fram hjá mjög mörgum mikilvægum atriðum sem lög um jafna stöðu karla og kvenna kveða á um, sem og dómafordæmum í jafnréttismálum.

„Með ólíkindum er að kærunefndin hafi komist að þeirri niðurstöðu að Aldísi hafi við skipun karls í embætti ríkissáttasemjara ekki verið mismunað á grundvelli kyns,“ segir Erna.

Segir hún miður að kærunefndin hafi kosið að líta fram hjá menntun Aldísar, sem jafnréttislög hafi verið skýr um, og meta hefði átt henni í hag.

Þá bendir hún á að jafnréttislög hafi þann tilgang að jafna stöðu kynjanna á vinnumarkaði og að þess beri að gæta að ganga ekki fram hjá hæfum konum við ráðningar í störf. Kærunefndin víki ekki einu orði að svokallaðri „forgangsreglu“ sem feli í sér að séu tveir umsækjendur um starf og hæfni þeirra metin hin sama, skuli leitast við að ráða það kynið sem á hallar.