Það er jafnan fagnaðarefni þegar limrubækur fæðast. Vigfús M. Vigfússon var að gefa út safn af ferðasögum í fimm línum og fleiri svipmyndir. Af því tilefni yrkir hann: Ef ferðast ég sumurin fögur fæðast oft örlitlar sögur sem fljúga út í geim en falla svo heim og fléttast í fimmlínu bögur

Pétur Blöndal

p.blondal@gmail.com

Það er jafnan fagnaðarefni þegar limrubækur fæðast. Vigfús M. Vigfússon var að gefa út safn af ferðasögum í fimm línum og fleiri svipmyndir. Af því tilefni yrkir hann:

Ef ferðast ég sumurin fögur

fæðast oft örlitlar sögur

sem fljúga út í geim

en falla svo heim

og fléttast í fimmlínu bögur.

Svo tók ég þeim saman að safna,

að saman þær næðu að dafna,

í letri á blöð

í láréttri röð,

á sextíu síðum að hafna.

Nú hollt er ég hætti að mala

heldur á torgunum gala:

„Á þrjúþúsund kall

þykist ég snjall

að bóða þér bókina fala.“

Sigrún Ásta Haraldsdóttir, Helgi Zimsen, Gunnar J. Straumland og Sigurlín Hermannsdóttir lesa úr bók sinni Samtímarímum í útgáfuhófi í Bókakaffinu Ármúla kl. 17 í dag. Hér er vísa eftir Gunnar:

Sá er allt um ekkert veit,

allt það færði í letur.

Ekkert samt um allt hann veit

en enginn veit þó betur.

Bob Dylan er mikið ræddur þessa dagana enda prýðismynd um hann í kvikmyndahúsum. „Hann er af úkraínskum og litháískum ættum en fæddist og bjó fyrstu æviárin í bænum Duluth í Minnesóta,“ skrifar Anton Helgi Jónsson. „Þar dvaldi um tíma annað alþýðuskáld sem okkur er líka kært, sjálfur Káinn.“ Af því tilefni kastar Anton Helgi fram vísum undir yfirskriftinni Duluth-vísur:

Götulíf og gróin torg

gæðaskáldin móta;

dágóð er sem draumaborg

Duluth Minnesóta.

Káinn rótlaus reyndi í

rugli sig að fóta

dögum saman drakk hann því

Duluth Minnesóta.

Heyri maður mæddan róm

minninga skal njóta;

Dylan man í drengjaskóm

Duluth Minnesóta.

Mörg er borgin fúl sem fól

fáir þar sín njóta

betur dáðadrengi ól

Duluth Minnesóta.