Góð veiði hefur verið að undanförnu hjá bátum sem gerðir eru út frá höfnum Snæfellsbæjar og landburður hefur verið af ljómandi fínum vertíðarfiski. Á föstudag í síðustu viku fiskuðu skipverjar á Bárði SH 81 rétt tæp 80 tonn og voru netin svo bunkuð að tvær landanir þurfti. Í hinni fyrri var komið með um 48 tonn í land og rúm 32 í þeirri síðari.
„Gangurinn í þessu er góður núna. Fyrir nokkrum dögum kom stór síldarganga hingað inn á Breiðafjörðinn og þorskurinn var á sömu slóð. Þessu fylgdi svo að síldinni, sem var alveg upp við fjöru, fylgdi mikið af hval; bæði háhyrningar og stórhveli sem eru sjaldséð hér,“ segir Pétur Pétursson, útgerðarmaður og skipstjóri á Bárði.
„Besti tími vertíðarinnar er í mars og apríl og við erum því bjartsýnir á framhaldið. Þorskurinn sem við höfum náð að undanförnu er yfirleitt í kringum 10 kíló og er eftirsóttur til vinnslu,“ segir Pétur enn fremur.
Á þriðja tug báta leggur upp nú í höfnum Snæfellsbæjar, það er í Ólafsvík og á Rifi. Þaðan er stutt á miðin undir Jökli, hvar eru einhver fengsælasta fiskislóðin við landið. Vel hefur til dæmis veiðst á Flákakanti, sem er úti á miðjum Breiðafirðinum um 16 sjómílur frá Víkinni, og þar var Kvika SH 23 á þriðjudaginn. „Við fórum út klukkan þrjú um nóttina og komum í land um kvöldmat og vorum þá með tíu og hálf tonn sem við veiddum á 12.000 króka línu. Þetta er fínn og eftirsóttur fiskur,“ segir Hjörtur Sigurðsson skipstjóri. Auk Hjartar, sem er til vinstri á myndinni hér að ofan, eru þrír karlar í áhöfninni á Kviku, sem er 14,5 brúttótonna plastbátur. sbs@mbl.is
Til baka
Leita í greinasafni
Prenta grein