Meistaradeildin Hákon Arnar Haraldsson á fleygiferð í leik Liverpool og Lille í deildarkeppninni þar sem franska félagið hafnaði í sjöunda sætinu.
Meistaradeildin Hákon Arnar Haraldsson á fleygiferð í leik Liverpool og Lille í deildarkeppninni þar sem franska félagið hafnaði í sjöunda sætinu. — AFP/Paul Ellis
[ Smellið til að sjá stærri mynd ]
Ensku liðin voru misheppin með drátt þegar dregið var í 16-liða úrslit Meistaradeildar karla í fótbolta í höfuðstöðvum UEFA í Nyon í Sviss í gær. Liverpool, sem hafnaði í efsta sæti deildarkeppninnar og trónir á toppi ensku úrvalsdeildarinnar, mætir …

Meistaradeildin

Bjarni Helgason

bjarnih@mbl.is

Ensku liðin voru misheppin með drátt þegar dregið var í 16-liða úrslit Meistaradeildar karla í fótbolta í höfuðstöðvum UEFA í Nyon í Sviss í gær.

Liverpool, sem hafnaði í efsta sæti deildarkeppninnar og trónir á toppi ensku úrvalsdeildarinnar, mætir Frakklandsmeisturum París SG, Arsenal mætir PSV frá Hollandi og Aston Villa mætir Club Brugge frá Belgíu.

Hákon Arnar Haraldsson og liðsfélagar hans í Lille mæta Borussia Dortmund frá Þýskalandi og þá verða tveir nágrannaslagir í sextán liða úrslitunum: Bayern München mætir Bayer Leverkusen og Real Madrid mætir Atlético Madrid.

Hákon gæti mætt Barcelona

Þá var einnig dregið í átta liða úrslit keppninnar og undanúrslitin en takist Liverpool að vinna sína viðureign gegn París SG, sem og Aston Villa sína viðureign gegn Club Brugge, þá munu ensku liðin mætast í átta liða úrslitunum.

Hákon Arnar og liðsfélagar hans í Lille mæta annaðhvort Benfica eða Barcelona, takist þeim að komast áfram í átta liða úrslitin, og ef Arsenal tekst að leggja PSV að velli mætir liðið annaðhvort Real Madrid eða Atlético Madrid í átta liða úrslitunum.

Leikirnir í sextán liða úrslitum keppninnar fara fram dagana 4.-5. mars og 11.-12. mars en leikið verður heima og að heiman, eins og í átta liða úrslitunum og undanúrslitum keppninnar.

Leikirnir í átta liða úrslitunum fara fram 8.-9. apríl og 15.-16. apríl og undanúrslitin dagana 29.-30. apríl og 6.-7. maí.

Úrslitaleikurinn fer svo fram þann 31. maí á Allianz Arena, heimavelli Bayern München.

Leikirnir í 16-liða úrslitunum:

Club Brugge – Aston Villa

Borussia Dortmund – Lille

Real Madrid – Atlético Madrid

Bayern München – Bayer Leverkusen

PSV – Arsenal

Feyenoord – Inter Mílanó

París SG – Liverpool

Benfica – Barcelona

Höf.: Bjarni Helgason