Fundað um flugvöllinn á fjölmennum fjarfundi

Eftir að felld voru um 500 tré í Öskjuhlíð um helgina, sem hindrað hafa flug til og frá austur/vestur-flugbrautinni á Reykjavíkurflugvelli, var í gær efnt til fjarfundar Reykjavíkurborgar, Samgöngustofu, Isavia og tíu bæjar- og sveitarstjóra.

Samkvæmt heimildum Morgunblaðsins var farið yfir stöðuna og mun Samgöngustofa taka ákvörðun í framhaldi af úttekt Isavia, um hvort óhætt sé að opna flugbrautina eftir þennan áfanga í trjáfellingunum.

Eins og fram hefur komið hafa tíu sveitarstjórnir sameiginlega mótmælt lokun flugbrautarinnar þar sem það er litið mjög alvarlegum augum að henni hafi verið lokað.

Aðdraganda málsins má rekja til þess að kröfum og ábendingu Isavia og Samgöngustofu til Reykjavíkurborgar um að fella tré í flugstefnu hafði ekki verið sinnt og á miðnætti þann 8. febrúar var austur/vestur-flugbrautinni lokað samkvæmt tilskipun Samgöngustofu.

Bogi Nils Bogason forstjóri Icelandair sagði við það tilefni ekki ásættanlegt að þessi staða væri komin upp, því að flugvöllurinn væri mjög mikilvægur hluti af innviðum þjóðarinnar hvað varðar innanlandsflug og sjúkraflug.

Eftir að flugbrautinni var lokað kom fram að Reykjavíkurborg ynni að aðgerðaáætlun og á sama tíma var jafnframt hafist handa við trjáfellingar. Skógarbóndi á Austurlandi undraðist vinnubrögðin og áætlaðan kostnað borgarinnar við verkið.

Í 150. grein laga um loftferðir, í kaflanum „Kvaðir og nauðsynlegar úrbætur í þágu flugöryggis“, kemur fram að telji Samgöngustofa verulega hættu stafa af hindrun flugs sé henni heimilt að bregðast við án tafar og með atbeina lögreglu ef þörf krefur.