Kvikmyndin Conclave stóð uppi sem sigurvegari kvöldsins á verðlaunahátíð Sambands kvikmynda- og sjónvarpsleikara í Bandaríkjunum, Screen Actors Guild (SAG), um helgina, samkvæmt frétt AFP. Myndin var verðlaunuð fyrir besta leikhópinn (sem eru aðalverðlaun kvöldsins), en í honum eru stórstjörnur á borð við Ralph Fiennes og Isabellu Rossellini.
Fyrir bestan leik í aðalhlutverki voru verðlaunuð þau Timothée Chalamet fyrir túlkun sína á Bob Dylan í A Complete Unknown og Demi Moore í The Substance. Í aukahlutverkum voru verðlaunuð Kieran Culkin í A Real Pain og Zoe Saldana í Emilia Perez.
SAG-verðlaunin eru oft talin hafa forspárgildi þegar kemur að sjálfum Óskarsverðlaununum, sem afhent verða aðfaranótt mánudagsins 3. mars. Ekki síst þar sem Hollywood-leikarar, sem greiða atkvæði í SAG-verðlaununum, eru fjölmennasti faghópurinn sem tilheyrir Bandarísku kvikmyndaakademíunni, sem greiðir atkvæði um Óskarsverðlaunin.
Til baka
Leita í greinasafni
Prenta grein