Staldrað við Miðgildi aldurs á Íslandi hækkaði lítið eitt á milli ára.
Staldrað við Miðgildi aldurs á Íslandi hækkaði lítið eitt á milli ára. — Morgunblaðið/Kristinn
Íslendingar eru ung þjóð í samanburði við flestar aðrar Evrópuþjóðir. Miðgildi aldurs eða miðaldur á Íslandi var 37 ár í upphafi seinasta árs, sem þýðir að helmingur landsmanna var yngri og hinn helmingurinn eldri en miðgildið segir til um

Íslendingar eru ung þjóð í samanburði við flestar aðrar Evrópuþjóðir. Miðgildi aldurs eða miðaldur á Íslandi var 37 ár í upphafi seinasta árs, sem þýðir að helmingur landsmanna var yngri og hinn helmingurinn eldri en miðgildið segir til um. Á sama tíma var miðaldur í löndum Evrópusambandsins að jafnaði 44,7 ár.

Meðal aðildarlanda ESB var miðgildi aldurs frá 39,4 árum á Írlandi til 48,7 ára á Ítalíu. Þessar upplýsingar koma fram í nýjum samanburði Eurostat, hagstofu Evrópusambandsins, á aldurssamsetningu íbúa í meirihluta Evrópulanda á seinasta ári.

Tölurnar sýna að Evrópuþjóðirnar eldast töluvert hratt. Miðgildi aldurs hækkaði í nær öllum löndum Evrópusambandsins á tíu ára tímabili, frá 2014 til 2024 eða um 2,2 ár að jafnaði.

Á Íslandi hreyfðist aldursmiðgildið ekkert á árunum 2021 til 2023 og var 36,7 ár en það hækkaði lítillega á seinasta ári og var þá komið upp í 37 ár samkvæmt tölum Eurostat eins og áður segir. Frá 2014 hefur miðgildi aldurs hér á landi hækkað um 1,4 ár.

Í löndum ESB er nokkur munur á miðaldri innfæddra íbúa, sem var 45,1 ár, og íbúa af erlendum uppruna, sem var 43,1 ár.

Tæp 60% íbúa í ESB-löndum sem eru af erlendum uppruna voru 20 til 54 ára en um 42% innfæddra íbúa voru á þeim aldri á seinasta ári. omfr@mbl.is