Frelsisþráin var sterk hjá Sveini Hannessyni frá Elivogum: Mín er þrá að fljúga frjáls fremur á mér sér það. Enga fá vil hespu um háls hver sem láir mér það. Frelsið er vandmeðfarið. Ekki fór vel fyrir Þormóði Pálssyni: Áður var ég ungur frjáls Eigin brautir ruddi

Pétur Blöndal

p.blondal@gmail.com

Frelsisþráin var sterk hjá Sveini Hannessyni frá Elivogum:

Mín er þrá að fljúga frjáls

fremur á mér sér það.

Enga fá vil hespu um háls

hver sem láir mér það.

Frelsið er vandmeðfarið. Ekki fór vel fyrir Þormóði Pálssyni:

Áður var ég ungur frjáls

Eigin brautir ruddi.

Nú er ég með hlekki um háls.

Heimabundinn tuddi.

Vísnagáta liðinnar viku barst sem endranær frá Páli Jónassyni:

Hann í brjósti okkar er,

annatími í sveitum hér,

háttum klukkum heyrist sá,

helst er drukknum manni á.

Harpa á Hjarðarfelli ratar á lausnina:

Í hverju brjósti hjartans sláttur.

Heyskapur er sláttur.

Hávær kirkjuklukknasláttur.

Á kófdrukknum var sláttur.

Lausnarorðið er sláttur og ólík merking í hverri línu. Það þvælist ekki fyrir Erlu Sigríði Sigurðardóttur:

Hjartsláttur í brjósti býr,

brjálæði á slætti.

Klukkusláttur slær sem gnýr

um slátt á drukknum manni.

Helgi Jensson leggur orð í belg:

Sláttur hjartans slær sinn takt,

sláttur önn í bóndans ranni,

sláttur klukku slær inn vakt

sláttur er á drukknum manni.

Þá Úlfar Guðmundsson:

Hjartsláttur í brjósti berst.

Bændur um slátt keppast við.

Klukkusláttur kallar gest.

Karlasláttur drykkju við.

Helgi Einarsson er á sínum stað:

Hjartsláttur í okkur er.

Annatími sláttur hér.

Klukknasláttur kólfum frá

og kófdrukknum oft sláttur á.

Loks Guðrún Bjarnadóttir:

Hjartsláttur brýnn í brjósti.

Bændur í slátt, með þjósti.

Með slættinum klukkan kallar.

Full kerla með slátt, nær allar.

Þá er það vísnagáta Páls fyrir næstu viku:

Sérhvert eldhús hefur hann,

hafður títt í peysum er,

gleður lúinn göngumann,

gegnum skólann saman fer.