Kyrrstaða orkumála verði rofin

Þótt allar ár landsins verði stíflaðar og vindmyllur settar upp á sérhverju fjalli er ekkert sem bendir til að slíkt „seðji þorsta orkukapítalistanna“. Þetta segir í bókun sem Helgi Hlynur Ásgrímsson, fulltrúi VG í byggðastjórn Múlaþings, lagði fram á fundi þess í vikunni. Þar voru til kynningar og umfjöllunar áform umhverfis,- orku- og loftslagsráðherra um að leggja fram fumvarp til að eyða lagalegri óvissu um leyfisveitingar til vatnsaflsvirkjana.

Ýmis samtök sveitarfélaga hafa að undanförnu ályktað um orkumál. Þau telja ekki þola bið að tryggja nægt framboð grænnar orku um allt land á ásættanlegu verði fyrir almenning og fyrirtæki. Gera þurfi lagabreytingar og einfalda stjórnsýslu til að rjúfa kyrrstöðu sem alltof lengi hafi verið í orkumálum. Undir þau sjónarmið tók meirihluti byggðaráðs Múlaþings – sem við sama tilefni ítrekaði þá afstöðu sína að mikilvægt væri að tryggja sanngjarna hlutdeild í tekjum af orkumannvirkjum til nærsamfélags á hverjum stað.

Fyrrgreindum sjónarmiðum sagðist Helgi Hlynur úr VG ekki að neinu leyti sammála skv. bókun hans í byggðaráði. Á Íslandi væri ekki orkuskortur, enda þótt eftirspurn væri ekki að öllu leyti mætt. Samtök sveitarfélaga á köldum svæðum ættu frekar frekar að krefja orkumálaráðherra um að stöðva verðhækkanir á orku til heimila í landinu og smærri og meðalstórra íslenskra fyrirtækja. Þar ætti kauphallarfyrirkomulag með sölu raforku ekki að koma til greina.

„Það að íslensk heimili séu látin keppa við erlend orkufrek gagnaver á uppboðsmarkaði með raforku stappar nærri sturlun,“ segir Helgi.