Undirritun F.v. Jenny Hill, sendiherra Kanada á Íslandi, Ríkarður Ríkarðsson, framkvæmdastjóri viðskiptaþróunar og nýsköpunar hjá Landsvirkjun, Robert Woolgar, framkvæmdastjóri Growler Energy, og Andrew Parsons, iðnaðar-, orku- og tæknimálaráðherra Nýfundnalands og Labrador.
Undirritun F.v. Jenny Hill, sendiherra Kanada á Íslandi, Ríkarður Ríkarðsson, framkvæmdastjóri viðskiptaþróunar og nýsköpunar hjá Landsvirkjun, Robert Woolgar, framkvæmdastjóri Growler Energy, og Andrew Parsons, iðnaðar-, orku- og tæknimálaráðherra Nýfundnalands og Labrador. — Ljósmynd/Landsvirkjun
Landsvirkjun Power í samstarfi við Growler Energy áformar að stofna félagið Vinland Power, um verkefnaþróun á sviði endurnýjanlegra orkugjafa. Fyrirtækið mun hafa aðsetur í kanadíska fylkinu Nýfundnalandi og Labrador

Óskar Bergsson

oskar@mbl.is

Landsvirkjun Power í samstarfi við Growler Energy áformar að stofna félagið Vinland Power, um verkefnaþróun á sviði endurnýjanlegra orkugjafa. Fyrirtækið mun hafa aðsetur í kanadíska fylkinu Nýfundnalandi og Labrador.

Vinland Power er ætlað að verða leiðandi í þróun orkuvinnslu á svæðinu og mun vinna með fjárfestingafélagi frumbyggja á svæðinu, en það tryggir mikilvæga aðkomu hagsmunaaðila og samfélaga á þeim svæðum sem verkefni á vegum félagsins ná til, segir í fréttatilkynningu.

Mikil þekking á orkuöflun

Landsvirkjun Power er dótturfyrirtæki Landsvirkjunar en erlend starfsemi Landsvirkjunar er innan vébanda þess. Félagið býr að mikilli þekkingu á orkuöflun á norðurslóðum og víðar. Undanfarinn áratug hefur fyrirtækið komið að ráðgjöf í 40 verkefnum í 15 löndum og verkefnaþróun í Georgíu, Kanada og Grænlandi.

Growler Energy er orkufyrirtæki á sviði endurnýjanlegrar orku og eru höfuðstöðvar þess í St. John’s, höfuðborg Nýfundnalands og Labrador. Fyrirtækið stundar einnig hagnýtar rannsóknir á vetni og öðru hreinu eldsneyti og geymslutækni. Landsvirkjun Power og Growler Energy hafa starfað saman að ýmsum verkefnum á undanförnum árum. Fyrir skömmu luku fyrirtækin þátttöku í tilraunaverkefni með félagi frumbyggja, NNC, um uppbyggingu vindorkuvers með rafhlöðugeymslukerfi í Nunavut í Kanada, en tilgangur þess var að draga úr notkun á dísilolíu til orkuframleiðslu.

Aðild frumbyggja, samfélagsþátttaka, sérfræðiþekking í orkumálum sem og staðarþekking í Nýfundnalandi og Labrador styður enn frekar við framþróun raforkukerfisins á svæðinu sem rekið er að mestu á endurnýjanlegum orkugjöfum og stendur framarlega á heimsvísu.

Telja að hægt sé að stjórna loftslagsbreytingum

Landsvirkjun Power er meðal stærri fyrirtækja í endurnýjanlegri orku í Evrópu og rekur vatnsafls- og jarðvarmavirkjanir sem framleiða um 2.150 MW af orku og tilraunaverkefni í vindorku.

Framtíðarsýn fyrirtækisins er að hægt sé að stjórna loftslagsbreytingum með endurnýjanlegum orkulausnum. Fyrirtækið segist bjóða upp á þróunar- og ráðgjafarlausnir þvert á virðiskeðjur vatnsafls og jarðvarma.

Útrás Landsvirkjunar

Landsvirkjun Power er dótturfyrirtæki Landsvirkjunar en erlend starfsemi Landsvirkjunar er innan vébanda þess.

Undanfarinn áratug hefur fyrirtækið komið að ráðgjöf í 40 verkefnum í 15 löndum og verkefnaþróun í Georgíu, Kanada og Grænlandi.

Landsvirkjun Power og Growler Energy áforma að stofna félagið Vinland Power, með aðsetur í Nýfundnalandi og Labrador.

Höf.: Óskar Bergsson