Bókamarkaðurinn er á nýjum og rúmgóðum stað í Holtagörðum og þangað streyma bókaunnendur. Hann stendur til 16. mars.
Bókamarkaðurinn er á nýjum og rúmgóðum stað í Holtagörðum og þangað streyma bókaunnendur. Hann stendur til 16. mars. — Morgunblaðið/Árni Sæberg
Traktorar í máli og myndum og Sígildir bílar voru meðal bóka sem Eyrún Guðnadóttir var ákveðin í að kaupa. „Ég er sveitamanneskja, bý í Reykhólasveit og hef áhuga á vélum og bílum,“ segir hún. „Ég kem ekki á bókamarkaðinn á hverju ári en hef samt farið nokkuð oft. Það er mjög gaman að kíkja.“
Hannes Sigurðsson og Laufey Erla Jóhannesdóttir voru vitanlega mætt á markaðinn enda hafa þau fyrir venju að koma þangað á hverju ári. „Við erum að leita að bókum fyrir barnabörnin og einhverjum bókum fyrir okkur sjálf,“ segir Laufey. „Börn í Reykjavík eftir Guðjón Friðriksson er bók sem okkur langar til að skoða,“ segir Hannes. „Annars notum við núna mest rafbækur. Við vorum að flytja og fórum með 15 bókakassa í Góða hirðinn. Samt er allt fullt af bókum á heimilinu.“ „Ég las allt en núna er ég í njósnasögunum og uppgötvaði að ég vanmat John Le Carré á sínum tíma, ég held að ég hafi ekki verið nógu þroskuð þegar ég las hann fyrst,“ segir Laufey. „Mér finnst Arnaldur alltaf fínn,“ bætir Hannes við.
Kristín Hildur Thorarensen, frá skólabókasafni Hofsstaðaskóla í Garðabæ, mætti til að kaupa bækur fyrir safnið. „Ég þarf að endurnýja í Kidda klaufa sem er alltaf jafn vinsæll. Leyndarmál Lindu er annar bókaflokkur sem er álíka vinsæll og Kiddi og svo bækurnar um Randver. Ég er líka að kaupa nýjar bækur sem komu út um síðustu jól og fræðibækur eins og bókina Geimurinn en í skólanum erum við með þemaverkefni um geiminn.“ Hún segir bókamarkaðinn mikilvægan fyrir skólabókasöfn. „Börn lesa helling þótt mörg hver mættu lesa meira. Það er mjög nauðsynlegt að börn hafi aðgang að bókum sem þau vilja lesa. Þau lesa ekki hvað sem er. Þau vilja bækur sem endurspegla þeirra líf og vilja frekar raunsæisbækur en fantasíur. Það á allavega við í 1.-7. bekkjum míns skóla.“
Bryndís vill selja 105.000 bækur.
Marta María Jónsdóttir og Ingibjörg Hannesdóttir eru sérfræðingar sem starfa í fræðsludeild Listasafns Íslands. „Við erum í fræðsludeild Listasafns Íslands, þar er listaverkstæði og alls konar starfsemi fyrir börn og við ætlum að kaupa bækur fyrir börn til að fá hugmyndir og vinna úr þeim. Við erum komnar með slatta af myndríkum bókum sem eru listaverk.“ Meðal bóka sem þær voru búnar að setja í körfu má nefna Vísindabók Villa, Hvernig er koss á litinn?, Bók um tré, Eldgos og Tjörnina eftir Rán Flygenring. „Markaður eins og þessi skiptir máli, við erum ríkisstofnun og erum að spara hægri vinstri, kaupum ekkert nema á ódýrum stöðum,“ segja þær.
„Ég kem hérna til að forvitnast og er sérstaklega að leita að ævisögum. Ég er búinn að finna Af hverju hefur enginn sagt mér þetta fyrr? eftir Julie Smith. Ég fletti í gegnum hana og sé að hún fjallar um lífið sjálft og hvernig við höldum haus,“ segir Karl Emil Pálmason. Hann segist koma á bókamarkaðinn annað hvert ár. Ég kaupi talsvert af bókum. Ég les ekki mikið af skáldsögum, er meira í raunveruleikanum.“
[ Smellið til að sjá stærri mynd ]
Á síðasta ári seldum við rétt rúmlega 100.000 bækur á 18 dögum.

Í ár erum við með vel rúmlega 6.000 titla sem skiptast þannig að um 30 prósent eru skáldverk, 30 prósent fræði- og handbækur og 40 prósent barnabækur,“ segir Bryndís Loftsdóttir, framkvæmdastjóri Félags íslenskra bókaútgefenda. „Á síðasta ári seldum við rétt rúmlega 100.000 bækur á 18 dögum. Við vonumst til þess að slá það met í ár, takmarkið í ár er að selja 105.000 bækur. Þess vegna hvetjum við landsmenn til þess að rýma náttborðin, pússa lesgleraugun og líta í heimsókn á Bókamarkaðinn í Holtagörðum, einn elsta og skemmtilegasta markað landsins.“

Bókamarkaðurinn var fyrst haldinn árið 1952 og hefur verið rekinn árlega nær óslitið síðan í rúm 70 ár. Markaðurinn er opinn alla daga milli kl. 10 og 20. Honum lýkur 16. mars.

Höf.: Kolbrún Bergþórsdóttir