Fræða þurfi almenning um sjávarútveginn

Staða sjávarútvegsins, uppgjör Brims og loðnuveiðar voru til umræðu í viðskiptahluta Dagmála þessa vikuna. Gestur þáttarins var Guðmundur Kristjánsson forstjóri Brims. Þátturinn birtist á mbl.is á morgun, fimmtudag.

Í þættinum barst talið að umræðunni um sjávarútveginn hér á landi.

Guðmundur segir að hann segi oft í gríni að umræðan um íslenskan sjávarútveg sé jákvæð erlendis en hún er ekki nógu jákvæð hjá innlendum aðilum. Þó séu Íslendingar stoltir af sínum sjávarútvegi séu þeir að ferðast erlendis.

„Sjávarútvegur er niðurgreiddur víða annars staðar og við borgum líka há laun í sjávarútvegi á Íslandi,“ segir Guðmundur.

Hann bætir við að ef aukin gjöld verði lögð á sjávarútveginn vonist hann til þess að stjórnvöld sýni útreikninga og frosendur áður en lagt sé fram lagafrumvarp.

„Svo virðist vera sem stjórnvöld geti bara komið með hvaða vitleysu sem er inn í þingið og stundum stoppar það þar og stundum ekki. Stjórnvöld þurfi því ekki að gera grein fyrir því hvaða afleiðingar það getur haft og hver sé hvatinn á bak við aðgerðirnar,“ segir Guðmundur.

Spurður hvað hann telji að þurfi til að snúa umræðunni hér innanlands á jávæðari veg segir Guðmudur að fræðsla sé lykilatriði.

„Ég held að við verðum að fræða almenning betur um af hverju við rekum fyrirtækin svona og hvaða leikrleglum við erum að fara eftir. Við verðum líka að ná samtali við stjórnvöld á hverjum tíma,“ segir hann.

Skattlagning hefur afleiðingar

Spurður hvaða væntingar hann hafi til nýrra stjórnvalda segir Guðmundur að hann sé ávallt bjartsýnn í upphafi.

„Ég er svolítið hugsi núna, ef það er aðalmálið að skattleggja sjávarútveginn ennþá meira. Og halda það að strandveiðar geti borið ábyrgð á því að sjávarútvegur lifi úti á landi er náttúrulega mikill misskilningur af því að áttatíu prósent af sjávarútveginum eru úti á landi. Og má kannski segja við því að það eru tuttugu og átta skráð félög í kauphöllinni. Það eru þrjú sjávarútvegsfélög og tvö eru úti á landi,“ segi Guðmundur.

Spurður hvort sjávarútvegurinn megi við frekari skattlagningu segir Guðmundur að hægt sé að skattleggja greinina endalaust.

„Ef sjávarútvegurinn verður skattlagður meira þá mun hann þjappast meira saman. Það er hægt að skattleggja meira en afleiðingarnar verða miklar,“ segir Guðmundur.