Jarðskjálftavirkni á Sundhnúkagígaröðinni á Reykjanesskaga hefur farið vaxandi og er nú svipuð og fyrir eldgosið í nóvember. Skjálftavirkni hefur mælst austan við gígaröðina og telja sérfræðingar Veðurstofu Íslands það líklegast vera gikkskjálfta af völdum vaxandi þrýstings vegna kvikusöfnunar, ekki endilega vísbendingu um líklegan uppkomustað. Ekki er þó hægt að útiloka það.
Segir í tilkynningu frá Veðurstofunni að verið sé að greina gögnin ítarlega til að varpa skýrara ljósi á orsök þessarar breytingar í staðsetningu skjálftanna.
Aflögunarmælingar sýna að landris heldur áfram á svipuðum hraða og síðustu vikur. Því heldur kvika áfram að safnast fyrir undir Svartsengi og hefur rúmmál hennar aldrei verið meira eftir að goshrinan á Sundhnúkagígaröðinni hófst í desember 2023. Líklegasta sviðsmyndin er enn að þetta kvikusöfnunartímabil endi með kvikuhlaupi yfir í gígaröðina og að þar gjósi í áttunda skipti frá því í lok árs 2023.
Í tilkynningunni segir að mögulegt sé að næsta eldgos verði stærra en fyrri gos á skagannum. Þrír mánuðir eru frá því síðasta gosi lauk og er þetta lengsta kvikusöfnunartímabil í þessari eldgosahrinu. „Þess vegna er mögulegt að ef til eldgoss kemur á næstu dögum eða vikum geti það orðið sambærilegt eða stærra en eldgosið í ágúst 2024 sem er það stærsta hingað til að rúmmáli. Byggt á fyrri atburðum mun stærð mögulegs eldgoss þó ráðast af því hversu mikil kvika losnar úr kvikuhólfinu þegar eldgos byrjar. Að svo stöddu er erfitt að segja til um stærð næsta atburðar með vissu,“ segir í tilkynningunni. Hættumat á svæðinu er óbreytt og gildir til 18. mars.
Til baka
Leita í greinasafni
Prenta grein