Misst einn úr frá 2013

Talsverð hætta er á að kvennalandslið Íslands í knattspyrnu verði án fyrirliðans Glódísar Perlu Viggósdóttur í leikjunum gegn Noregi og Sviss í Þjóðadeildinni en þeir fara fram á Þróttarvellinum 4. og 8. apríl.

Þorsteinn Halldórsson landsliðsþjálfari skýrði frá því á fréttamannafundi KSÍ í gær að Glódís væri með beinmar í hné en hún hefur fyrir vikið misst af tveimur leikjum með Bayern München að undanförnu.

Hann sagði að líkurnar á að Glódís yrði með í landsleikjunum væru um það bil fimmtíu prósent.

Það yrðu mikil viðbrigði fyrir liðið að leika án fyrirliðans. Glódís hefur frá 21. júlí 2013, þegar hún lék með Íslandi gegn Svíþjóð í átta liða úrslitum Evrópumótsins, aðeins misst af einum mótsleik íslenska landsliðsins. Þá var hún hvíld á varamannabekknum í léttum sigurleik gegn Kýpur árið 2021.

Glódís hefur misst af þremur leikjum Bayern í vetur, tveimur þeim síðustu vegna meiðslanna og einum fyrr í vetur vegna leikbanns, en fram að því hafði hún aðeins misst úr einn leik á síðustu átta árum með liðum sínum í atvinnumennsku í Þýskalandi og Svíþjóð.

Hildur og Amanda tilbúnar

Glódís er samt í leikmannahópnum sem Þorsteinn tilkynnti í gær en hann gerði tvær breytingar frá leikjunum í Sviss og Frakklandi í febrúar.

Hildur Antonsdóttir og Amanda Andradóttir misstu af þeim vegna meiðsla en koma nú inn á nýjan leik í staðinn fyrir Bryndísi Örnu Níelsdóttur og Ásdísi Karenu Halldórsdóttur.

Ísland er með eitt stig eftir fyrstu tvo leikina en liðið gerði markalaust jafntefli í Sviss og tapaði 3:2 í Frakklandi.

Frakkar unnu áður Norðmenn, 1:0, í fyrstu umferðinni og Norðmenn sigruðu Sviss, 2:1, í annarri umferð.

Riðlakeppni Þjóðadeildarinnar lýkur með tveimur umferðum í vor þegar Ísland sækir Noreg heim 30. maí og fær Frakkland í heimsókn 3. júní. Sæti í A-deild undankeppni HM 2027 er í húfi.