Lítið þokast í viðræðum um stjórn

Línur hafa lítið skýrst í viðræðum stjórnmála­flokka á Græn­landi um myndun nýrrar lands­stjórnar í kjölfar þing­kosninga í síðustu viku þar sem stjórnarflokkarnir IA og Siumut misstu meirihluta sinn.

Formlegar stjórnarmyndunarviðræður eru ekki hafnar en Jens-Frederik Nielsen formaður Demokraatit, sem vann sigur í kosningunum, hefur átt fundi með formönnum annarra flokka.

Nielsen hefur ekki viljað tjá sig við grænlenska fjölmiðla um fundina en bæði Múte Bourup Egede, formaður flokksins IA og fráfarandi formaður lands­stjórnarinnar, og Vivian Motzfeldt, nýr formaður Siumut, hafa sagt að viðræðurnar hafi litlu skilað og erfitt sé að sjá að grund­völlur sé fyrir samstarfi flokkanna við Demokraatit.