Herskip NATO við GIUK-hliðið

Minnst þrjú herskip úr fastaflota Atlantshafsbandalagsins (NATO) eru nú hér við land og lá í gær eitt þeirra við bryggju á Akureyri. Hin tvö voru þá vestur af Vestfjörðum, en áður hafði sést til skipanna út af Austfjörðum. Er þetta liður í auknu eftirliti NATO með hafsvæðinu sem myndar hið svokallaða GIUK-hlið, þ.e. svæðið sem nær frá Grænlandi um Ísland til Bretlands. Lína þessi er lykill í kafbáta- og herskipavörnum á Norður-Atlantshafi.

NATO segir GIUK-hliðið, þ. á m. hafsvæðið um Ísland, kjörið til æfinga fyrir siglingar á norðurslóðum. Mikilvægt sé að bandalagið búi yfir þeim styrk sem þarf til að tryggja öfluga fótfestu í þessum heimshluta, enda eigi sjö af átta norðurskautsríkjum aðild að Atlantshafsbandalaginu. Rússland er eitt undanskilið.

Mikilvægt hafsvæði NATO

Arjen S. Warnaar, yfirskipherra í hollenska sjóhernum, segir þessa æfingu fastaflota NATO hafa verið stífa og unna í nánu samstarfi við Landhelgisgæslu Íslands og danska sjóherinn.

„Á sama tíma höfum við aukið þekkingu okkar á svæðinu verulega. Og á það við jafnt á hafi og í lofti. Mjög gagnleg og skilvirk þjálfun á afar mikilvægu svæði,“ segir hann.

Æfing sem þessi er NATO nauðsynleg, eykur m.a. viðveru herskipa á hafsvæði bandalagsins og stuðlar að enn nánari samvinnu aðildarríkjanna.