Mark Carney, nýr forsætisráðherra Kanada, hefur boðað skyndikosningar sem haldnar verða 28. apríl. Miðað við kannanir stefnir í æsispennandi kosningabaráttu á milli Frjálslynda flokksins og Íhaldsflokksins.
Kjörtímabilið klárast ekki fyrr en í haust en þrátt fyrir það hafði verið búist við því að boðað yrði til kosninga fyrr.
Samskiptin við Bandaríkin, ásælni Donalds Trumps Bandaríkjaforseta í Kanada og tollastríð verða stærstu kosningamálin miðað við kannanir.
Segir Trump vilja brjóta Kanadamenn niður
Frjálslyndi flokkurinn var fyrir skömmu verulega óvinsæll en ný bylgja af þjóðernisstolti Kanadamanna virðist vera að skila sér í auknum vinsældum flokksins.
„Ég bið Kanadamenn um sterkt, jákvætt umboð til að takast á við Trump forseta,“ sagði Carney og bætti við að Trump vildi „brjóta okkur niður svo Bandaríkin geti átt okkur. Við munum ekki láta það gerast.“
Frjálslyndi flokkurinn mælist með 37,5% fylgi á sama tíma og Íhaldsflokkurinn mælist með 37,1% fylgi.
Nýir demókratar mælast með 11,6% og Bloc Québécois 6,4% fylgi. Kosningakerfið í Kanada er eins og í Bretlandi þar sem eru einmenningskjördæmi.
„Ég mun styrkja land okkar svo við getum staðið á eigin fótum og staðið uppi í hárinu á Bandaríkjamönnum, þar sem og þegar þess er þörf. Það er það sem ég á við þegar ég segi að við ætlum að setja Kanada í forgang,“ sagði Pierre Poilievre leiðtogi Íhaldsflokksins í gær. Hann tók einnig fram að það skipti máli að sýna Bandaríkjaforseta virðingu.
Til baka
Leita í greinasafni
Prenta grein