Nýr ráðherra segir að það þurfi að „taka til“

Guðmundur Ingi Kristinsson, nýr mennta- og barnamálaráðherra, tók við lyklunum að ráðuneytinu í gær í kjölfar síns fyrsta ríkisráðsfundar.

„Ég ætla að afhenda þér þetta lyklakort að ráðuneytinu og óska þér innilega góðs gengis. Hlakka til að starfa mér þér og við öll hérna í ráðuneytinu,“ sagði Erna Krist­ín Blöndal ráðuneyt­is­stjóri er hún rétti Guðmundi lyklana og blómvönd.

Athygli vakti að Ásthildur Lóa Þórsdóttir, fyrrverandi mennta- og barnamálaráðherra, mætti ekki til að afhenda lyklana eins og hefð er fyrir. Hún tjáði sig ekki við fjölmiðla er hún mætti á Bessastaði í gær og þá yfirgaf hún húsið með því að fara út bakdyramegin.

Guðmundur svaraði nokkrum spurningum er hann tók við lyklunum en hann kvaðst mjög spenntur fyrir nýja starfinu. Hann sagðist aðspurður myndu skoða hvort sam­ræmd próf yrðu tek­in upp aft­ur og að í ljós kæmi hvort stefnu­breyt­ing yrði í mennta­mál­um.

Finnst þér vera neyðarástand í menntamálum á Íslandi?

„Það þarf að taka til. Sem betur fer er þessi ríkisstjórn með það á verkefnalista að taka til virkilega,“ sagði Guðmundur sem bætti því við að hann ætlaði láta verkin tala sem mennta- og barnamálaráðherra.

Spurður hvort það væru einhver sérstök mál sem hann vildi leggja áherslu þá sagði hann það einfaldlega vera mennta-, barna- og íþróttamál.

Kemur til greina að taka upp samræmd próf?

„Já, þetta er allt í skoðun.“

Hann kvaðst bara rétt vera að byrja og því hefði hann ekki tekið neina ákvörðun um hvort breytingar yrðu gerðar á aðstoðarmönnum ráðherra. Guðbjörg Ingunn Magnúsdóttir aðstoðaði Ásthildi Lóu en hún er eiginkona Ragnars Þórs Ingólfssonar þingflokksbróður Guðmundar.

Hver ráðherra má ráða sér allt að tvo aðstoðarmenn.