Karlmaður sem kastaði öðrum manni fram af svölum fyrir þremur vikum var handtekinn af lögreglu í kjölfarið. Brotaþolinn var fluttur á sjúkrahús til aðhlynningar með áverka. Málið er til rannsóknar hjá lögreglunni á Norðurlandi eystra

Karlmaður sem kastaði öðrum manni fram af svölum fyrir þremur vikum var handtekinn af lögreglu í kjölfarið. Brotaþolinn var fluttur á sjúkrahús til aðhlynningar með áverka. Málið er til rannsóknar hjá lögreglunni á Norðurlandi eystra.

Þetta sagði Börkur Árnason, varðstjóri hjá lögreglunni á Akureyri, í samtali við mbl.is síðdegis í gær. Fyrr um daginn hafði lögreglan greint frá atvikinu á samfélagsmiðlum. Í fyrstu umfjöllun mbl.is um málið kom fram að atvikið hefði gerst um síðustu helgi en það er ekki rétt og hefur verið leiðrétt.

Í færslunni segir lögreglan að ofbeldishegðun í samfélaginu hafi aukist töluvert undanfarin misseri og kveðst hún hafa miklar áhyggjur af því.

„Þarna var manni hent fram af stigagangi þar sem hann fer yfir vegg og lendir á öðrum stigapalli,“ sagði Börkur en að hans sögn er brotaþoli ekki í lífshættu. Börkur sagðist ekki vera með upplýsingar um tengsl árásarmannsins og brotaþola.