Orkumálastjóri Bretlands, John Pettigrew, segir Heathrow-flugvöll ekki hafa skort neitt rafmagn þegar ákveðið var síðastliðinn föstudag að fella þar niður allt flug í kjölfar eldsvoða í nálægri spennistöð. Vel hefði mátt halda vellinum gangandi með eðlilegum hætti enda hægt að tryggja rafmagn til Heathrow í gegnum tvær aðrar spennistöðvar. Það var hins vegar ákvörðun flugvallarrekanda að stoppa umferð.
Heathrow er fjölfarnasti flugvöllur Bretlands og því hafði sú ákvörðun að loka vellinum miklar afleiðingar fyrir þúsundir flugfarþega. Pettigrew segir stjórnendur Heathrow bera ábyrgð á því, þeir hafi vitað af öðrum spennistöðum en ekki viljað nýta sér þær. Var ástæðan sú að tæknimenn vallarins töldu að það tæki of langan tíma að tengja hinar stöðvarnar og fara í gegnum nauðsynlega öryggisúttekt í kjölfarið.
„Það skorti enga getu frá öðrum spennistöðvum. Þessar tvær hefðu vel getað tryggt rafmagn til Heathrow, ein hefði meira að segja dugað,“ segir Pettigrew og bætti við: „Það að missa út spennistöð er einstakur viðburður en það voru hins vegar tvær aðrar reiðubúnar til að taka við.“
Flókið verk að skipta um stöð
Tæknimenn Heathrow segja málið ekki svo einfalt. Nauðsynlegt hefði verið að framkvæma hundruð öryggisúttekta á hinum ýmsu kerfum flugvallarins hefðu menn tekið þá ákvörðun að tengjast nýrri spennistöð. Segja þeir slíka aðgerð „gríðarlega áskorun“.
Lokun Heathrow hafði áhrif á um 1.350 flugferðir. Eldurinn í spennistöðinni er ekki talinn vera af utanaðkomandi ástæðum. Einhvers konar bilun í búnaði er ástæðan.
Til baka
Leita í greinasafni
Prenta grein