Einmánuður hefst í dag og svo kemur harpa sumardaginn fyrsta. Af því tilefni yrkir Ingólfur Ómar Ármannsson: Einmánuður oft er napur og ýrinn stundum ís og krap er yfir grundum. Harpa okkur hlýju færir hjartans barnið andar blítt á ískalt hjarnið

Pétur Blöndal

p.blondal@gmail.com

Einmánuður hefst í dag og svo kemur harpa sumardaginn fyrsta. Af því tilefni yrkir Ingólfur Ómar Ármannsson:

Einmánuður oft er napur og ýrinn
stundum

ís og krap er yfir grundum.

Harpa okkur hlýju færir hjartans
barnið

andar blítt á ískalt hjarnið.

Ennþá brennur Ólafi Stefánssyni í muna:

Þegar lýkur hér lífsgöngu okkar,

verða lagðir til hliðar þeir sokkar,

sem léða við fengum

er Laufásveg gengum,

meðan enn voru ljósir lokkar.

Árni Bergmann rakst í Eglu á skemmtilega kenningu: „samtog sverða“. Hann sendi þættinum kveðju:

Með „samtogi sverða“ Egill er

orrustu snarpri að lýsa.

En „samtog lima“ sýnist mér

til samfara góðra vísa.

Jón Jens Kristjánsson bregður á leik í limru:

Hér taka margir til máls

og mun látið sverfa til stáls

það fólkinu hitar

að forsetinn ritar

föðurnafn sitt til hálfs.

Kvæðamaðurinn Steindór Andersen fræddi mig um að Guðmundur Guðmundsson, hreppstjóri í Kaupangi, Eyjafirði, hefði orti á Þingeyrum um tóbakstönn Gísla Magnússonar:

Þinn við munn eg mynnist greitt

mitt í nunnusafni,

þér ég unni af þeli heitt

þú ert sunnu jafni.

Svo fylgdi með vísa eftir ókunnan höfund.

Enginn kemur og enginn sést,

enginn dvelur hjá mér,

allir sem ég unni mest

eru burtu frá mér.

Kristján J. Jóhannsson, Króki á Ísafirði, var maður frelsisins:

Frelsi sálgar löggjöf lúð

lítt fær þrifist öldin.

Af oss tálga hold og húð

harðdræg yfirvöldin.

Að síðustu Hallmundur Kristinsson:

Ekki flokkast undir gort

eg þótt sjálfur greini;

vísur get ég alltaf ort

ef ég bara reyni!